کابل: امریکی وزیر خارجہ مائیک پومپیو غیر اعلانیہ دورے پر افغانستان پہنچ گئے جہاں انہوں نے افغان صدر اشرف غنی سے ملاقات کی۔
تفصیلات کے مطابق امریکی وزیر خارجہ مائیک پومپیو پیر نو جولائی کو غیر اعلانیہ دورے پر افغانستان کے دارالحکومت کابل پہنچے ہیں، جہاں انہوں نے اشرف غنی کے علاوہ افغان حکومت کے چیف ایگزیکٹو عبداللہ عبداللہ سے بھی ملاقات کی۔
غیر ملکی خبر رساں ادارے کا کہنا ہے کہ ان ملاقاتوں کے بعد صحافیوں سے گفتگو کرتے ہوئے امریکی وزیر خارجہ مائیک پومپیو کا کہنا تھا کہ امریکا افغان حکومت اور طالبان کے درمیان ہونے والے مذاکراتی عمل کی حمایت کرے گا بلکہ ان کا اہتمام کرنے کے علاوہ ان کا حصہ بننے سے بھی گریز نہیں کرے گا۔
شمالی کوریا کے جوہری ہتھیار تلف ہونے تک پابندیاں برقرار رہیں گی، امریکی وزیر خارجہ
ان کا مزید کہنا تھا کہ امریکی صدر ڈونلڈ ٹرمپ چاہتے ہیں کہ افغانستان میں مزید امریکی فوجی تعینات کیے جائیں تاکہ افغان طالبان پر دباؤ بڑھے اور وہ مذاکرات کی میز پر آئیں۔
خیال رہے کہ امریکی وزیر خارجہ مائیک پومپیو گزشتہ روز جاپان کا دورہ ختم کر کے ویتنام پہنچے تھے، پومپیو ویتنامی دارالحکومت سے براہ راست کابل آئے ہیں۔
یاد رہے کہ دو روز قبل مائیک پومپیو نے جاپان کا دورہ کرتے ہوئے شمالی کوریا کے معاملے کو اپنا موضوع بنایا تھا، انہوں نے ٹوکیو میں پریس کانفرنس کرتے ہوئے کہا تھا کہ جب تک شمالی کوریا جوہری ہتھیار مکمل طور پر تلف نہیں کرتا تب تک شمالی کوریا پر عائد پابندیاں نہیں ہٹائی جائیں گی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
