اسلام آباد: سابق وزیراعظم شاہد خاقان عباسی کو قومی اسمبلی کے حلقہ این اے 57 مری سے الیکشن لڑنے کی اجازت مل گئی۔
تفصیلات کے مطابق سپریم کورٹ میں چیف جسٹس میاں ثاقب نثار اور جسٹس اعجازالاحسن پر مشتمل بینچ نے مسلم لیگ ن کے رہنما شاہد خاقان عباسی کے کاغذات نامزدگی کی منظوری کے خلاف درخواست پر سماعت کی۔
چیف جسٹس نے سماعت کے دوران وکیل درخواست گزار سے استفسار کیا کہ آپ کا کیس سے کیا تعلق ہے؟ کیا آپ مخالف امیدوار ہیں۔
درخواست گزار کے وکیل نے جواب دیا کہ میں اس حلقے کا ووٹر ہوں، چیف جسٹس نے ریمارکس دیے کہ آپ نے عدالت کا وقت ضائع کیا۔
سپریم کورٹ نے شاہد خاقان عباسی کی نا اہلی سے متعلق درخواست خارج کردی اور انہیں قومی اسمبلی کے حلقہ این اے 57 مری سے الیکشن لڑنے کی اجازت دے دی۔
شاہد خاقان عباسی کو الیکشن لڑنے کی اجازت مل گئی
خیال رہے کہ گزشتہ ماہ لاہور ہائی کورٹ نے سابق وزیر اعظم شاہد خاقان عباسی کو الیکشن ٹریبونل کی جانب سے نااہل قرار دیے جانے کا فیصلہ معطل کردیا تھا۔
این اے 57 ، سابق وزیراعظم شاہدخاقان عباسی نااہل قرار
واضح رہے کہ 27 جون کو اپیلٹ ٹریبونل کے جج جسٹس عبد الرحمٰن لودھی نے این اے 57 سے شاہد خاقان عباسی کے کاغذات نامزدگی پر فیصلہ سناتے ہوئے سابق وزیراعظم کو نااہل قرار دیا تھا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
