اسلام آباد: انتخابات 2018 میں واضح اکثریت حاصل کرنے کے بعد پاکستان تحریکِ انصاف نے وفاق میں حکومت سازی سے متعلق مشاورت کا عمل تیز کر دیا ہے۔
تفصیلات کے مطابق پی ٹی آئی نے اپنی حکومت بنانے کے لیے وفاقی کابینہ کے ناموں پر غور شروع کر دیا ہے، ناموں کے سلسلے میں مشاورت جاری ہے۔
ذرائع کا کہنا ہے کہ قومی اسمبلی میں اسپیکر کے اہم منصب کے لیےعارف علوی اور شفقت محمود کے ناموں پر غور کیا جا رہا ہے تاہم شفقت محمود کا اے آر وائی کی الیکشن ٹرانسمیشن میں کہنا تھا کہ وہ اس منصب کے لیے موزوں نہیں ہیں۔
ذرائع کے مطابق شاہ محمود قریشی کا نام وزارتِ خارجہ کے سلسلے میں لیا جا رہا ہے جب کہ پی ٹی آئی کی خاتون رہنما شیریں مزاری کو دفاع کا شعبہ حوالے کیا جا سکتا ہے۔
پی ٹی آئی کی وفاقی کابینہ میں اسد عمر کو وزیرِ خزانہ بنائے جانے کا فیصلہ پہلے ہی کیا چکا ہے، تاہم وفاقی وزیرِ داخلہ کے لیے خیبر پختونخوا سے پرویز خٹک اور شفقت محمود مضبوط امیدوار قرار دیے جا رہے ہیں۔
تحریکِ انصاف کے ترجمان فواد چوہدری کو وزارتِ اطلاعات جب کہ عوامی مسلم لیگ کے سربراہ شیخ رشید احمد کو ریلوے کا قلم دان دیے جانے کا امکان ہے۔
عمران خان کا خطاب، متوقع پالیسیوں پر اظہار خیال، دھاندلی الزامات کی تحقیقات کی پیش کش
ذرائع کا کہنا ہے کہ جنوبی پنجاب صوبہ محاذ کے صدر خسرو بختیار، مراد سعید اور چوہدری سرور کو بھی وفاقی کابینہ میں لینے کا امکان ہے۔
کہا جا رہا ہے کہ ملک امین اسلم کو مشیر برائے ماحولیات کا عہدہ دیا جا سکتا ہے، دوسری طرف اعظم سواتی، غلام سرور، اقلیتی امیدوار رمیش کمار، عامر لیاقت اور شہریار آفریدی کے نام بھی وفاقی کابینہ کے لیے زیرِ غور ہیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
