اسلام آباد: مسلم لیگ ن کے رہنما طلال چوہدری نے اپنی سزا کے خلاف اپیل کرنے کا اعلان کیا ہے۔
تفصیلات کے مطابق مسلم لیگ ن کے رہنما طلال چوہدری نے اپنی سزا مکمل کرنے کے بعد عدالت کے باہر میڈیا سے گفتگو کرتے ہوئے کہا کہ میرے خلاف کیس کئی ماہ سے چل رہا تھا۔ انتخابات میں کیس کا فائدہ مخالفین نے اٹھایا۔
انہوں نے کہا کہ جمہوریت پسند ہوں، آئین کے تحفظ کا حلف اٹھایا تھا۔ ایسا کوئی لائحہ عمل نہیں اپناؤں گا جس سے جمہوریت کمزور ہو۔
طلال چوہدری نے کہا کہ سپریم کورٹ سے سزا کے خلاف اپیل کروں گا۔
خیال رہے کہ آج صبح طلال چوہدری کو سپریم کورٹ نے آرٹیکل 204 کے تحت توہین عدالت کا مرتکب قرار دیتے ہوئے عدالت برخاست ہونے تک کی سزا سنائی جس کے بعد وہ اگلے 5 سال کے لیے کسی بھی عوامی عہدے کے لیے نااہل ہوگئے۔
طلال چوہدری پر 1 لاکھ روپے جرمانہ بھی عائد کیا گیا ہے۔
مسلم لیگ ن کے رہنما نے کچھ عرصہ قبل جڑانوالہ کے جلسے میں عدلیہ کے خلاف توہین آمیز زبان استعمال کی تھی۔
بعد ازاں چیف جسٹس میاں ثاقب نثار نے انہیں توہین عدالت کا نوٹس جاری کیا تھا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
