لاہور: حالیہ بارشوں سے ملک کے دریاؤں اور ڈیموں میں پانی کی مسلسل آمد کا سلسلہ جاری ہے ، تربیلا میں پانی جمع کرنے کی گنجائش ختم ہوگئی۔
تفصیلات کےمطابق ملک میں ہونے والی بارشوں سے تربیلا ڈیم مکمل طور پر بھر چکا ہے جبکہ منگلا ڈیم بھرنے کے قریب ہے ، ملک بھر کے دریاؤں میں اس وقت طغیانی کی صورتحال ہے۔
تربیلاڈیم میں پانی کی آمد دو لاکھ 25 ہزار 100 کیوسک فٹ ہے جبکہ تربیلا ڈیم سےپانی کا اخراج دو لاکھ 24 ہزار 800 کیوسک فٹ ہے۔منگلا ڈیم میں پانی ذخیرہ کرنے کی ابھی 65 فٹ گنجائش موجود ہے ، اس وقت ڈیم میں پانی کی آمد 28 ہزار اوراخراج 10ہزار کیوسک فٹ ہے جبکہ ہیڈمرالہ پر پانی کی آمد 75100 اور اخراج 44500 کیوسک فٹ ہے۔
ذرائع کا کہنا ہے کہ سندھ میں بھی اس وقت پانی کی یہی صورتحال ہے سکھر اور کوٹر ی کے مقام پر پانی دروازوں کی سطح تک موجود ہے اور بڑی تعداد میں کوٹری بیراج سے پانی کا اخراج کیا جارہا ہے ، یہ سارا پانی سمند ر میں جاگرے گا۔
یا درہے کہ ڈیڑھ ماہ قبل بارشوں میں تاخیر اور گلیشئر نہ پگھلنے سے ملک کے سب سے بڑے ڈیم تربیلا میں پانی کا قابل استعمال ذخیرہ ختم ہونے کے بعد پانی کی سطح ڈیڈ لیول ایک ہزار 386 فٹ پرآگئی تھی۔
پاکستان میں ہر سال مون سون کے موسم میں بڑی تعداد میں پانی دریاؤ ں سے پانی آتا ہے تاہم طویل عرصے سے ملک محض منگلا اور تربیلا نامی دو بڑے ڈیموں سمیت چند چھوٹے ڈیموں پر انحصا کررہا رہے ، ذخیر ہ کرنے کی گنجائش نہ ہونے کے سبب ہر سال یہ پانی سمندر میں ضائع ہوجاتا ہے۔
