سکھر: سندھ اسمبلی کے اسپیکر آغا سراج درانی نے کہا ہے کہ اگر کسی کو اعتراض ہے تو سرکاری گاڑیاں بیچنے کے لیے تیار ہیں، میرے ساتھ کوئی بڑا پروٹوکول نہیں ہوتا۔
ان خیالات کا اظہار انہوں نے سکھر میں میڈیا سے گفتگو کرتے ہوئے کیا، اسپیکر سندھ اسمبلی کا کہنا تھا کہ میرے ساتھ کوئی بڑا پروٹوکول نہیں ہے، صرف چند گاڑیاں ہیں۔
انہوں نے کہا کہ اگر کوئی اعتراض کرے تو ہم سرکاری گاڑیاں بیچنے کے لیے تیار ہیں۔
آغا سراج درانی کا یوم دفاع پر تبصرہ کرتے ہوئے کہنا تھا کہ یوم دفاع پر تمام شہدا کو خراج عقیدت پیش کرتے ہیں، فوج کی قربانیوں کی بدولت یہ ملک سلامت ہے۔
رہنما پی پی شرجیل میمن سے متعلق پوچھے گئے ایک سوال پر ان کا کہنا تھا کہ شرجیل میمن کے معاملے پر سندھ حکومت جواب دے گی۔
شرجیل میمن کی شراب کی بوتلوں کی ٹیسٹ رپورٹ جعلی ثابت، سرعام ٹیم نے بھانڈا پھوڑ دیا
واضح رہے کہ سابق صوبائی وزیرشرجیل میمن پونے چھ ارب روپے کرپشن ریفرنس میں احتساب عدالت کے ہاتھوں جیل کی سلاخوں کے پیچھے پہنچے ہیں۔
گزشتہ دنوں چیف جسٹس پاکستان میاں ثاقب نثار کو کراچی کے اسپتالوں میں سیاسی قیدیوں کے کمروں پر چھاپوں کے دوران ضیاء الدین اسپتال میں شرجیل میمن کے کمرے سے شراب کی بوتلیں ملی تھیں۔
یاد رہے کہ شرجیل میمن کے کمرے سے برآمد ہونے والی بوتلیں ٹیسٹ کیلئے سندھ لیبارٹری بھیجی گئی تھیں، بعد ازاں رپورٹ مسترد کردی گئی تھی۔
