لندن: برطانیہ میں شقی القلب باپ نے اپنی آٹھ سالہ بیٹی کو خنجر کے وار کرکے قتل کردیا ، سانحے سے کچھ لمحے قبل اس نے بچی کی ماں کو بھی قتل کرنے کی دھمکی دی تھی۔
تفصیلات کے مطابق چاقو کے حملے سے بچی کو قتل کرنے کا یہ واقعہ رواں سال جنوری میں وال سال کے علاقے میں پیش آیا تھا، عدالت کو مقدمے کی سماعت کے دوران سانحے کی تفصیلات سے آگاہ کیا گیا ہے۔
بتایا جارہا ہے کہ مائلی بلنگھم نامی آٹھ سالہ بچی کے سینے میں خنجر کا وار کرکے اسے قتل کردیا تھا ، عدالت کو یہ بھی بتایا گیا کہ بچی کے والد ولیم بلنگھم کی عمر ۵۵ سال ہے اور وہ بچی کی ماں کے کسی اور سے تعلقات کے سبب پریشان تھا۔ دوسری جانب والد نے قتل سے انکار کرتے ہوئے کہا ہے کہ اس نے قتل کرنے کی دھمکی ضرور دی تھی۔
استغاثہ کے وکیل کریم خلیل کا کہنا ہے کہ قتل سے چند لمحے قبل بچی کی ماں ٹریسی ٹینڈری اسے لینے کے لیے ولیم کے گھر آئی تو ولیم نے اسے چاقو دکھاتے ہوئے قتل کی دھمکی دی تھی ، جس کے سبب وہ مکان سے کچھ فاصلے پر چلی گئی تھی ، بعد ازاں وہی چاقو اس کی بچی کے سینے میں گڑا ہوا پایا گیا۔
مقدمے کی سماعت عدالت میں جاری ہے اور کہا جارہا ہے کہ بچی کے قتل میں اس کے باپ کو سزا ہونے کے امکانات بہت زیادہ ہیں ۔
