پشاور کے چپلی کباب پاکستان بھر کے علاوہ دنیا بھر میں بھی اپنی لذت اور ذائقہ کے لیے مشہور ہیں۔ چپلی کبابوں کے بننے کی خوشبو نہ صرف مقامی افراد بلکہ باہر سے آنے والوں کو بھی اپنی طرف کھینچتی ہے۔
چپلی کباب خاص طور پر گائے کے گوشت سے بنائے جاتے ہیں مگر یہ بکرے، بھیڑ اور مرغی کے گوشت سے بھی بن سکتے ہیں۔ چپلی کباب پشتو کے لفظ چپرخ سے نکلا ہے، جس کا معنی ہے گول، یا چپٹا۔
اجزا
گائے کا قیمہ – آدھا کلو
مکئی کا آٹا
اناردانہ – ایک چمچ
زیرہ – ایک چمچ
ثابت دھنیا – ایک چمچ
گرم مصالحہ – پسا ہوا ایک چائے کا چمچ
پسی ہوئی سرخ مرچ – ایک چائے کا چمچ
نمک – حسب ذائقہ
انڈا – ایک عدد
پیاز باریک کٹا ہوا – ایک عدد
ہرا پیاز،باریک کٹا ہوا – 4 عدد
ادرک پیسٹ – ایک چمچ
لہسن پیسٹ – ایک چمچ
ہری مرچ باریک کٹی ہوئی – 2 عدد
ٹماٹر سخت – باریک کٹے ہوئے
سبز دھنیا کٹا ہوا – 4 کھانے کے چمچ
کچا پپیتا – ایک چائے کا چمچ
تیل – آدھا کپ
ترکیب
قیمے میں تمام مصالحے ، ٹماٹر، پیاز، ہری مرچ، ہرا دھنیہ، پودینہ اور انڈا شامل کر کے اچھی طرح مکس کرلیں۔
اس کے بعد آدھے گھنٹے کے لیے قیمہ رکھ دیں تاکہ مصالحہ جذب ہو جائے، اب حسب ضرورت بڑے اور باریک کباب بنا لیں۔
پھر فرائی پین یا توے پر مکھن اور تیل تھوڑا تھوڑا کرکے ڈالیں اور کبابوں کو فرائی کریں۔
براؤن ہونے پر سلاد اور ہری چٹنی کے ساتھ تندوری نان کے ساتھ گرما گرم چپلی کباب مہمانوں کو سرو کریں، اتنے منفرد کباب اس سے پہلے آپ نے نہیں کھائیں ہوں گے۔
