اسلام آباد: سابق وزیرِ اعظم نواز شریف کے خلاف فلیگ شپ ریفرنس اور سابق وزیرِ خزانہ اسحاق ڈار کی جائیداد کی نیلامی کی سماعت احتساب عدالت میں آج ہوگی۔
تفصیلات کے مطابق احتساب عدالت میں اڈیالہ جیل سے ضمانت پر رہا نواز شریف کے خلاف فلیگ شپ کی سماعت ہوگی جب کہ نیب کی درخواست پر اسحاق ڈار کی جائیداد کی نیلامی کی بھی آج ہی سماعت ہوگی۔
نواز شریف کے کیس کی سماعت احتساب عدالت کے جج محمد ارشد ملک کریں گے، جب کہ اسحاق ڈار کے کیس کی سماعت احتساب عدالت کے جج محمد بشیر کریں گے۔
نواز شریف اڈیالہ جیل سے رہائی کے بعد تیسری بار احتساب عدالت میں پیش ہوں گے، دوسری طرف نیب کے مطابق سابق وزیرِ خزانہ جان بوجھ کر عدالتی کارروائی سے مفرور ہیں، ملزم بیماری کا بتا کر بیرون ملک مقیم ہو گئے ہیں۔
یہ بھی پڑھیں: العزیزیہ ریفرنس : جے آئی ٹی کا مواد تفتیشی افسر بطورشواہد پیش نہیں کرسکتے‘ عائشہ حامد
فلیگ شپ ریفرنس میں جے آئی ٹی سربراہ واجد ضیا اپنا بیان قلم بند کرائیں گے، 27 ستمبر کو بھی نواز شریف احتساب عدالت میں پیش ہوئے تھے، اس سے قبل کی سماعت میں نواز شریف کے وکیل نے جے آئی ٹی سربراہ واجد ضیا پر جرح مکمل کرلی تھی۔
اسحاق ڈار کے کیس میں نیب پراسیکیوٹر عمران شفیق درخواست پر دلائل دیں گے، گزشتہ سماعت پر اسحاق ڈار کی جائیداد کی تفصیلات پیش کی گئی تھیں، احتساب عدالت نے جائیداد قرقی کے لیے نوٹس کی تعمیلی رپورٹ مانگ رکھی ہے۔
