حیدرآباد: ایک اور شخص راتوں رات کروڑ پتی بن گیا، حیدرآباد کے پردیپ کمار کے اکاؤنٹ میں چار کروڑ 99 لاکھ 54 ہزار 432 روپے آگئے۔
تفصیلات کے مطابق غریب شہریوں کے بھاری بینک اکاؤنٹس کا سلسلہ رکا نہیں ہے اب حیدرآباد کا رہائشی پردیپ کمار راتوں رات کروڑ پتی بن گیا ہے، پردیپ کمار کے اکاؤنٹ میں 4 کروڑ 99 لاکھ 54 ہزار 432 روپے آگئے، ڈرائیور نے اے ٹی ایم سے تنخواہ نکالی تو سلپ دیکھ کر حیران رہ گیا۔
پردیپ کمار کا کہنا ہے کہ گزشتہ مہینے اکاؤنٹ میں اٹھارہ ہزار روپے تھے جب وہ نکالنے گیا تو سلپ دیکھ کر حیران رہ گیا، ڈرائیور نے متعلقہ افسران کو معاملے سے آگاہ کردیا ہے۔
یہ پڑھیں: فالودہ فروش بیٹھے بیٹھے ارب پتی بن گئے
واضح رہے کہ شہر قائد کے رہائشی فالودہ فروش عبدالقادر کے اکاؤنٹ میں 2 ارب روپے آگئے تھے جس کی تحقیقات ایف آئی اے نے شروع کردی تھی، فالودہ فروش کا کہنا تھا کہ ایف آئی اے نے پوچھ گچھ کے لیے طلب کیا ہے۔
فالودہ بیچنے والے شہری نے مزید کہا تھا کہ ’مجھے جو دستخط دکھائے گئے وہ انگریزی میں ہیں، جب کہ میں انگوٹھا چھاپ ہوں، انگریزی میں دستخط نہیں کر سکتا۔‘
مزید پڑھیں: جھنگ کے طالبِ علم کے اکاؤنٹ میں بھی کروڑوں روپے نکل آئے
خیال رہے کہ جھنگ کے طالب علم اسد علی کے اکاؤنٹ میں 17 کروڑ 30 لاکھ روپے موجود ہونے کا انکشاف ہوا تھا جس کے بعد ایف آئی اے ٹیم مذکورہ طالب علم کو جھنگ سے لے کر کراچی روانہ ہوگئی تھی۔
اسد علی بی ایس سی کا طالب علم ہے، اسد علی کا کہنا تھا کہ کراچی آج تک نہیں دیکھا، اب تحقیقات کے لیے بلایا گیا ہے، اتنی بڑی رقم سے کوئی تعلق نہیں ہے میری مدد کی جائے۔
