لاہور: پیشہ ور گدا گر کا بھانڈا پھوٹ گیا، معذور بن کر عوام کو بیوقوف بنانے والا شخص ڈولفن فورس نے دھر لیا.
تفصیلات کے مطابق ملک بھر میں گداگر ی کے پردے میں عوام کو بیوقوف بنانے کا سلسلہ جاری ہے، پیشہ ور بھکاری ڈھونگ کرکے عوام سے پیسے بٹورتے ہیں.
ایسے ہی ایک ڈھونگی کا بھانڈا ڈولفن فورس نے پھوڑ دیا. اپنی اداکاری سے عوام کو لوٹنے والا نام نہاد بھکاری سیکیورٹی فورس کے ہتھے چڑھ گیا.
حماد نامی یہ شاطر شخص لاہور کے علاقے کینال روڈ پر بیساکھیاں تھامے کھڑا ہوجاتا اور شہریوں سے بھیک مانگتا. البتہ اُسے بیساکھیوں کی ضرورت نہیں تھی، عام حالات میں وہ بنا کسی سہارے کے چلتا پھرتا نظر آتا.
مزید پڑھیں: سندھ حکومت کا گداگروں کے خلاف کریک ڈاؤن کا فیصلہ
ڈولفن فورس کے اہل کاروں نے حماد نامی اس شخص کو گرفتار کر لیا، ساتھ ہی عوام کو ہدایت کی ہے کہ ہمدردی کے جذبے کے تحت کسی شخص کی مدد کرتے ہوئے یہ ضرور دیکھ لیں کہ وہ مدد کا مستحق ہے یا نہیں.
یاد رہے کہ گذشتہ دنوں سندھ حکومت نے کراچی میں پیشہ ور بھکاریوں کے خلاف کریک ڈاؤن کا اعلان کیا تھا۔ ساتھ ہی چائلڈ پروٹیکشن اتھارٹی کو ۔بھی مزید فعال کرنے کا فیصلہ کیا گیا ہے۔
