لندن: بریگزٹ معاملے پر برطانیہ اور یورپی یونین معاہدے کے مسودے پر متفق ہوگئے اور جلد اہم پیش رفت کا اعلان کیا جائے گا۔
تفصیلات کے مطابق برطانیہ اور یورپی یونین کے درمیان بریگزٹ کے معاملے پر اب تناؤ کم ہونے لگا، دونوں فریقین بریگزٹ معاہدے کے مسودے پر تکنیکی سطح پر متفق ہو گئے۔
غیر ملکی خبر رساں ادارے کے مطابق جلد برطانیہ اور یوپی یونین کی جانب سے مشترکہ پیش رفت کا اعلان کیا جائے گا، جبکہ حکام کی جانب سے بریگزٹ معاملے پر کوئی بیان سامنے نہیں آیا۔
دوسری جانب برطانوی وزیر اعظم تھریسا مے نے آج ملکی کابینہ کا اجلاس طلب کر لیا ہے، جلد ہی سرکاری سطح پر بھی اس اتفاق رائے کا اعلان کر دیا جائے گا۔
بریگزٹ ڈیل، برطانوی وزیراعٓظم تھریسامے کی مشکلات میں اضافہ
برطانیہ کے ایک اعلیٰ عہدیدار نے یہ دعویٰ کیا تھا کہ لندن اور برسلز بریگزٹ معاہدے کے ’بہت ہی قریب‘ پہنچ چکے ہیں۔
خیال رہے کہ بریگزٹ ڈیل نہ ہونے کی صورت میں ملین پاؤنڈ کے سیکڑوں منصوبے شروع کرنے ہوں گے، بریگزٹ ڈیل نہ ہونے کی صورت میں برطانوی معیشت کو نقصان کا اندیشہ ہے۔
یاد رہے کہ گزشتہ ماہ برطانوی وزیر خارجہ فلپ ہمونڈ کا کہنا تھا کہ اس میں کوئی شک نہیں کہ یورپی رہنما برطانیہ کے ساتھ بریگزٹ ڈیل چاہتے ہیں اس حوالے سے اقدامات کرنے ہوں گے۔
ان کا کہنا تھا کہ بریگزٹ معاملے پر یورپ اور برطانیہ کے تناؤ کے باعث برطانوی معیشت بھی متاثر ہورہی ہے، اس بابت اقدامات کی ضرورت ہے۔
