کراچی: آج دنیا بھر میں ٹریفک حادثات کے متاثرین کی یاد میں عالمی دن منایا گیا، شہرِ قائد میں بھی عالمی دن کی مناسبت سے تقریب منعقد کی گئی۔
تفصیلات کے مطابق ٹریفک حادثات کے متاثرین کی یاد میں عالمی دن کے موقع پر سی ویو پر ایڈیشنل آئی جی کراچی ڈاکٹر امیر شیخ کی سربراہی میں واک کا اہتمام کیا گیا۔
[bs-quote quote=”بہت سارے ٹریفک حادثات کو حفاظتی اقدامات کے ذریعے رونما ہونے سے روکا جا سکتا ہے۔” style=”style-7″ align=”left” color=”#dd3333″][/bs-quote]
کراچی میں یہ تقریب ٹریفک حادثات میں جاں بحق اور زخمیوں کی یاد کے ساتھ ساتھ ٹریفک اہل کاروں اور ریسکیو عملے کی حوصلہ افزائی میں منعقد کی گئی۔ یہ دن ہر سال دنیا بھر میں نومبر کی تیسری اتوار کو منایا جاتا ہے۔
یہ دن اس لیے بھی منایا جاتا ہے کہ ہر سال دنیا بھر کی سڑکوں پر لاکھوں لوگ حادثات کا شکار ہوتے ہیں، جس سے نہ صرف وہ خود بلکہ ان کے خاندان بھی بری طرح متاثر ہو جاتے ہیں۔
ان حادثات میں کثیر تعداد ایسے حادثوں کی ہوتی ہے جنھیں حفاظتی اقدامات کے ذریعے رونما ہونے سے روکا جا سکتا ہے، اور لوگوں کو آگاہی فراہم کر کے حادثے کے شکار افراد کو بچانے کے لیے تیار کر کے اموات کی شرح کم کی جاسکتی ہے۔
دریں اثنا، ریسکیو ذرائع کے مطابق کراچی کے علاقے سرجانی ٹاؤن برکت پمپ کے قریب موٹر سائیکل ڈمپر کی زد میں آ گئی، جس کے نتیجے میں 2 بچے جاں بحق ہو گئے، بچوں کی عمریں دس اور بارہ سال تھیں۔
یہ بھی ملاحظہ کریں: حب : اوتھل کے قریب مسافرکوچ الٹ گئی‘ 3 افراد جاں بحق
ریسکیو ذرائع کے مطابق سپر ہائی وے نوری آباد پر کار اور ٹرک میں تصادم کے نتیجے میں 2 افراد جاں بحق جب کہ 6 زخمی ہوئے، جب کہ سی ویو کے قریب بھی ٹریفک حادثے میں 2 افراد جان سے ہاتھ دھو بیٹھے۔
ڈیفنس میں کار کی موٹر سائیکل کو ٹکر سے 2 افراد کی موت کے واقعے میں پولیس نے گاڑی چلانے والے 16 سالہ لڑکے معیز کو گرفتار کر لیا، گرفتار لڑکا او لیول کا طالب علم ہے، پولیس نے واقعے کا مقدمہ بھی درج کر لیا۔ حادثے میں جاں بحق موٹر سائیکل سوار نوجوان بھٹائی آباد اور گلستان جوہر کے رہائشی تھے۔
