لاہور: وزیرِ اعظم کے مشیر برائے احتساب شہزاد اکبر نے کہا ہے کہ سوئس حکومت کے ساتھ پاکستان سے لوٹی گئی دولت کی واپسی کے لیے دو طرفہ معاہدہ ہونے جا رہا ہے۔
وہ اے آر وائی نیوز کے پروگرام پاور پلے میں گفتگو کر رہے تھے، انھوں نے کہا کہ پاکستان سے لوٹی گئی دولت کی واپسی سب سے اہم کام ہے، لوٹے ہوئے 700 ارب روپے 10 ممالک میں رکھے ہیں۔
[bs-quote quote=”آج رات سوئٹزر لینڈ جا رہا ہوں، قوم جلد خوش خبری سنے گی۔” style=”style-7″ align=”left” color=”#dd3333″ author_name=”شہزاد اکبر”][/bs-quote]
بیرسٹر شہزاد اکبر نے کہا ہے کہ کچھ ممالک کی تفصیلات سامنے آ گئی ہیں، مزید تحقیقات کر رہے ہیں، برطانیہ، سوئٹزر لینڈ اور متحدہ عرب امارات پر ہماری خصوصی توجہ ہے، سوئس حکام کے ساتھ بھی رابطے میں ہیں۔
معاونِ خصوصی برائے احتساب شہزاد اکبر کا کہنا تھا کہ وہ آج رات سوئٹزر لینڈ جا رہے ہیں، انھوں نے کہا کہ اس سلسلے میں قوم جلد خوش خبری سنے گی۔
شہزاد اکبر نے کہا ’سوئٹزر لینڈ کے ساتھ معاہدے ہونا ضروری ہیں جس کے تحت تفصیلات شیئر ہوں گی، پاکستان کی لوٹی ہوئی دولت سے متعلق سوئٹزر لینڈ سے دو طرفہ معاہدے کرنے ہیں۔ کام مکمل ہو جائیں گے تو اثاثوں کی واپسی ممکن ہو سکے گی۔‘
یہ بھی پڑھیں: سوئٹزر لینڈ میں بے انتہا پیسہ پڑا ہوا ہے، لوگ وائٹ کالر کرائم کرکے پیسہ لوٹ کر چلے گئے، چیف جسٹس
انھوں نے مزید کہا ’جرمنی کے ساتھ بھی معلومات کے تبادلے کا معاہدہ ہونے جا رہا ہے، جو معلومات چھپانے کی کوشش کی جا رہی ہے وہ ہمیں مل جائے گی۔‘
شہزاد اکبر کا کہنا تھا کہ پاکستان سے کرپشن کا پیسا دبئی سے ہوتے ہوئے مختلف ممالک گیا، یہ پیسا مختلف ممالک سے ہوتا ہوا چین بھی منتقل کیا گیا، غیر قانونی طریقے سے 29 ملین ڈالر پاکستان سے چین منتقل ہوئے۔
انھوں نے کہا کہ چین میں یابیٹ کے سی ای او سے ملاقات نہیں ہوئی، یابیٹ کی پوری قیادت چین میں جیل میں ہے، ملتان میٹرو کیس میں چین میں حکام سے ملاقات ہوئی، جس میں کرپشن کے 70 فی صد ملزمان کی معلومات ہمیں فراہم کر دی گئی ہیں، ملتان میٹرو میں 29 ملین ڈالر کی کرپشن ہوئی ہے۔ حکومت تمام منصوبوں کا فرانزک آڈٹ کرنے جا رہی ہے۔
