کراچی: صدر مملکت عارف علوی نے قوم سے اپیل کی ہے کہ وہ درآمد شدہ اشیاء کے بجائے پاکستان میں تیار کی جانے والی مصنوعات استعمال کریں۔
سماجی رابطے کی ویب سائٹ پر عارف علوی کا کہنا تھا کہ ’ملک کا قیمتی زرمبادلہ بچائیں اور پاکستان میں تیار کی جانے والی اشیاء کو ہی استعمال کریں‘۔
صدر مملکت نے قوم سے میڈان پاکستان اشیاء خریدنے کی اپیل کرتے ہوئے کہا کہ ’چاہتا ہوں عوام درآمد شدہ اشیاء کے بجائے پاکستان میں ہی تیار ہونے والی مصنوعات استعمال کریں‘۔
ڈاکٹر عارف علوی کا کہنا تھا کہ ’موجودہ بحران کی صورت حال میں ہمیں پرتعیش اشیاء اور درآمدی مصنوعات سے گریز کرنا چاہیے، اگر قوم اپنی ضروریات کو دیکھے تو معلوم ہوگا اُن کی روزمرہ زندگی میں استعمال ہونے والی اشیاء درآمد شدہ ہیں، ہمیں ان سے اجتناب کیا جاسکتا ہے‘۔
مزید پڑھیں: انٹربینک مارکیٹ میں ڈالر کی قیمت 142 روپے کی بلند ترین سطح پر
صدر مملکت کا کہنا تھا کہ ’پاکستان میں تیار کی جانے والی مصنوعات اور اُن کی خریداری کا کام ہمیں مشترکہ طور پر کرنا ہوگا‘۔
یاد رہے کہ ڈاکٹر عارف علوی نے قوم سے یہ اپیل اُس وقت کی جب روپے کی قدر میں ریکارڈ کمی دیکھی جارہی ہے، دو روز قبل ڈالر کی قیمت کو پر لگ گئے تھے اور 8 روپے اضافے کے بعد ڈالر 142 تک پہنچ گیا تھا۔
یاد رہے 23 نومبر کو اوپن مارکیٹ میں ڈالر کی قیمت 135 روپے پر بلند ترین سطح پر پہنچ گئی تھی۔
خیال رہے نئی حکومت نے تین ماہ میں صرف 76کروڑچالیس لاکھ ڈالر کا قرض حاصل کیا اس کے علاوہ رواں مالی سال میں 9ا رب 69 کروڑ 10 لاکھ ڈالر کا قرضہ لیا جائے گا۔
