کراچی : تحریک انصاف نے میئرکراچی کو ہٹانے کا مطالبہ کردیا ، خرم شیرزمان کا کہنا ہے کہ ایم کیوایم تجاوزات کےخلاف آپریشن پرموقف واضح کرے اور فوری طور پراپنا میئر تبدیل کرے۔
تفصیلات کے مطابق تحریک انصاف کے رہنما خرم شیر زمان نے میئرکراچی وسیم اختر کو ہٹانے کا مطالبہ کرتے ہوئے کہا ایم کیوایم فوری طور پر اپنا میئر تبدیل کرے اور تجاوزات کے خلاف آپریشن پر مؤفف واضح کرے، وزیرا عظم سےبھی معاملے پر بات چیت کی جائے گی۔
غریبی مٹانے نکلے ہیں، غریب مٹانے کے لئے نہیں، فردوس شمیم
دوسری جانب سندھ اسمبلی میں اپوزیشن لیڈر فردوس شمیم نقوی کا کہنا ہے کہ تجاوزات ہٹانے کے طریقہ کار پر تحفظات ہیں، پہلے موقع دیا جاتا ہے لوگ تجاوزات ہٹا دیں، غریبی مٹانے نکلے ہیں، غریب مٹانے کے لئے نہیں۔
فردوس شمیم نقوی نے کہا کہ کراچی سرکلر ریلوے نے بے چینی پیدا کی ہوئی ہے، تجاوزات میں معاونت کرنیوالے افسران کو سزا ہونی چاہیے، میئر کراچی اپنے محکموں کے لوگوں کی نشاندہی کریں، شہرمیں ٹریفک جام کے باعث لاکھوں کا پیٹرول ضائع ہوتا ہے۔
تجاوزات آپریشن، کاروباری افراد کے نقصانات اور تحفظات پر قرارداد جمع
اس سے قبل پی ٹی آئی نے سندھ اسمبلی میں تجاوزات آپریشن، کاروباری افراد کے نقصانات اور تحفظات پر قرارداد جمع کرائی تھی، جس میں کہا گیا تھا کہ عدالتی احکامات کی آڑ میں کاروباری حضرات کو نقصان پہنچایا جارہا ہے۔
خرم شیرزمان کا کہنا تھا کہ تمام جماعتیں تجاوزات کے خلاف ہمارے مؤقف کی حمایت کررہی ہیں، چیف جسٹس کے حکم کی آڑمیں لوگوں کو نقصان پہنچایا جارہا ہے، جن لوگوں کو نقصان پہنچایا گیا، ان کا ازالہ کیا جائے۔
رہنما تحریک انصاف نے کہا چیف جسٹس دیکھیں شہر کو کتنا نقصان پہنچایا جارہا ہے، عدالت کے ناظر کے ذریعے آپریشن کی مانٹیرنگ کی جائے، ایم کیو ایم لوگوں سے بدلہ لے رہی ہے۔
خیال رہے کہ وفاقی وزیر بحری امور علی زیدی نے بھی چیف جسٹس سے اپیل کی ہے کہ وہ تجاوزات سے متعلق آپریشن پر ایک کمیٹی تشکیل دیں جو عدالت کو کارروائیوں سے متعلق آگاہ کرتی رہے۔
واضح رہے کراچی میں سپریم کورٹ کے حکم پر تجاوزات اور غیر قانونی تعمیرات کے خلاف آپریشن زور و شور سے جاری ہے جبکہ انتظامیہ عدالتی احکامات کی مزید وضاحت کی ضرورت بھی محسوس کر رہی ہے۔
