اسلام آباد: وزیر اعظم عمران خان کا کہنا ہے کہ کاروبار میں سہولتوں کی فراہمی حکومت کی اولین ترجیح ہے، فلاح وبہبود اور سرمایہ کاری کے لیے حکومت کے دروازے نجی شعبے کے لیے کھلے ہیں۔
ان خیالات کا اظہار وزیر اعظم نے اوورسیز انویسٹر چیمبر آف کامرس اینڈ انڈسٹری کے وفد سے ملاقات میں کہی، اس دوران کاروبار اور سرمایہ کاری کے فروغ کے لیے ون ونڈو سروسز اور ٹیکس کے امور پر تبادلہ خیال کیا گیا۔
وزیراعظم عمران خان کا کہنا تھا کہ ٹیکنالوجی کمپنیز حکومت کی کئی شعبوں میں مدد کر سکتی ہیں۔
انہوں نے کہا کہ تعلیم، صحت، گورننس اور دیگر شعبوں میں آئی ٹی کے استعمال سے جدت لائی جاسکتی ہے۔
ان کا مزید کہنا تھا تھا کہ فلاح وبہبود اور سرمایہ کاری کے لیے حکومت کے دروازے نجی شعبے کے لیے کھلے ہیں، اس بابت ہر ممکن اقدامات کیے جائیں گے۔
وزیر اعظم عمران خان کراچی پہنچ گئے
خیال رہے کہ وزیر اعظم عمران خان ایک روزہ دورے پر شہر قائد میں ہیں جہاں وہ سرمایہ کاری سے متعلق برنس کمیونٹی سے اہم ملاقاتیں کررہے ہیں۔
وزیر اعظم کو گورنر ہاوس میں شہر قائد کے ترقیاتی کاموں تجاوزات کے خلاف جاری آپریشن اور دیگر امور پر بریفنگ دی جائے گی، وزیر اعظم عمران خان کی متحدہ قومی موؤمنٹ پاکستان کے وفد سے بھی ملاقات متوقع ہے۔
واضح رہے کہ عمران خان کو وزارت عظمیٰ کا منصب سنبھالنے کے بعد شہر قائد کا یہ دوسرا دورہ ہے، جس دوران وزیر اعظم گورنر سندھ اور وزیر اعلیٰ سندھ مراد علی شاہ سے بھی ملاقات کریں گے۔
