لیاقت پور: پنجاب میں پیش آیا افسوس ناک واقعہ جہاں سفاک دیور نے تیز دھار آلے سے مطلقہ بھابھی کا گلا کاٹ دیا۔
تفصیلات کے مطابق پنجاب کے شہر رحیم یار خان میں بے رحم دیور نے مطلقہ بھابھی کی جان لے لی، تیز دھار آلے سے گلا کاٹ ڈالا۔
رحیم یار خان کے علاقے لیاقت پور میں دیورنے دن دہاڑے گھر میں گھس کر مطلقہ بھابھی کا گلا کاٹ دیا، ماں کو بچانے کی کوشش میں کم سن بچی کی انگلی کٹ گئی۔
پولیس کے مطابق 45 سالہ مطلقہ خاتون منزہ بی بی اپنی دو کمسن بچیوں کے ہمراہ رہائش پذیر تھی، گذشتہ روز دن کے وقت اس کا دیور محمدارشد قوم بپڑ اپنی بہن نسیم بی بی زوجہ قطب الدین کے ہمراہ اُس کے گھر آیا اور اچانک تیز دھار چھری سے منزہ بی بی پر حملہ کردیا۔
شور سن کر ساتھ والے کمرے میں موجود منزہ بی بی کی دس سالہ بیٹی نور فاطمہ نے ماں کو بچانے کی کوشش کی مگر اس دوران ملزم نے منزہ بی بی کے گلے پر چھری پھیر دی۔
بچانے کی کوشش میں کم سن بچی کی انگلی بھی چھری لگنے سے کٹ گئی، بتایا گیا ہے کہ مقتولہ کے دو بیٹے اور پانچ بیٹیاں تھیں تاہم وہ اپنی دو چھوٹی بیٹیوں کے ہمراہ کرایہ کے چوبارہ پر رہائش پذیر تھی۔
ملزم ارشد کو پولیس نے موقع واردات سے گرفتار کرلیا، اطلاع ملتے ہی تھانہ لیاقت پور پولیس اور ریسکیو 1122موقع پر پہنچے اور مقتولہ کی نعش کو اسپتال منتقل کردیا گیا جبکہ ریسکیو اہلکاروں نے زخمی بچی کی مرہم پٹی کی۔
