اسلام آباد: ملک کے بیشتر علاقوں میں موسم آج بھی سرد اورخشک رہے گا، بالائی علاقوں میں پارہ منفی گیارہ ڈگری سینٹی گریڈ تک گرنے کاامکان ہے۔
تفصیلات کے مطابق ملک میں سردی نے ڈیرے جما لیے، بالائی علاقوں میں خون جما دینے والی سرد ہواؤں نے لوگوں کو گھروں میں رہنے پر مبجور کردیا، اسکردو میں پارہ منفی گیارہ ڈگری سینٹی گریڈ تک گرنے کا امکان ہے۔
محکمہ موسمیات نےآئندہ چوبیس گھنٹوں میں کراچی، حیدرآباد، سکھر، کوئٹہ، قلات، بارکھان، لاہور، ملتان، فیصل آباد، راولپنڈی، اسلام آباد، پشاور، ڈی آئی خان سمیت ملک کے بیشتر علاقوں میں موسم سرد اور خشک رہنے کی پیش گوئی کی ہے۔
محکمہ موسمیات کا کہنا ہے کہ بالائی علاقوں میں سردی کی شدت میں اضافہ ہوگا، پنجاب کے وسطی اور جنوبی علاقوں میں بعض مقامات پر صبح کے اقات میں شدید دھند کا امکان ہے۔
کوئٹہ کی ٹھنڈی ہواؤں نے کراچی کا رخ کرلیا، سردی کی شدت میں اضافہ
دوسری جانب شہرِقائد کے باسی کڑاکے کی سردی سے بچنے کے لیے تیار ہوجائیں، کوئٹہ کی ٹھنڈی ہواؤں کے اثرات کراچی بھی پہنچیں گے، محکمہ موسمیات نے دو روز تک تیز ہوائیں چلنے کی پیش گوئی کررکھی ہے۔
کراچی سے کشمیر تک سردی رنگ جمانے لگی ہے، یخ بستہ ہواؤں نے ملک کے دیگر علاقوں کی طرح بلوچستان کو اپنی لپیٹ میں لے لیا، جس کے سبب شہرقائد میں بھی ٹھنڈی ہوائیں چلنا شروع ہوگئی ہیں۔
