لاہور: ایف آئی اے کی جانب سے فرانزک آڈٹ شروع ہونے پر اسکول مالکان نے فیس میں بیس فیصد کمی پر رضامندی ظاہر کردی۔
تفصیلات کے مطابق تمام نجی اسکولوں نے سپریم کورٹ کے حکم پرفیس میں کمی پر رضا مندی ظاہر کردی ہے، والدین کو اطلاع دینا بھی شروع کردی ہے۔
ذرائع کے مطابق بیکن ہاؤس ،ایل جی ایس ،روٹس اسکول ، رسیورسز اکیڈمی اور ایڈن لاکاس سمیت تمام اسکول فیس 20 فیصد کم کرنےپرراضی ہوگئے ہیں، ان اسکولوں کے مالکان نے ایف آئی اے کو فیس کم کرنے سے آگاہ کردیا ہے۔
کچھ اسکولوں کی انتظامیہ کی جانب سے زیرتعلیم بچوں کے والدین کو فیس میں کمی کے بارے میں لیٹر بھجوادیے گئے ہیں جبکہ باقی اسکول اس سلسلے میں انتظامات کررہے ہیں۔
یاد رہے کہ سپریم کورٹ کے حکم کے بعد کراچی ،لاہور اور سکھر میں ایف آئی اے نے کارروائی کرتے ہوئے اسکولوں پر چھاپے مار کر ریکارڈ تحویل میں لے لیا تھا، جبکہ 22 بڑے نجی اسکولوں سے متعلق مراسلہ بھی جاری کیا گیا تھا۔
کراچی سمیت سندھ کے شہروں میں سولہ اسکولوں پر چھاپے مارے گئے تھے ، بیکن ہاؤس اور سٹی اسکول کی متعدد برانچوں کاریکارڈ ضبط کیا گیا تھا جبکہ بےویو اکیڈمی ، جنریشن اسکول، فروبل ایجوکیشن سینٹراورسولائزیشن اسکول کا ریکارڈبھی ضبط کرلیا گیا تھا ۔
ایف آئی اے لاہور کے ترجمان نے بتایا تھا کہ لاہور میں تمام نجی اسکولوں کا ریکارڈ تحویل میں لے لیا ہے، بیکن ہاؤس، لاہورگرامر،روٹس آئی وی اور دیگر کا ریکارڈ ضبط کیا گیا ہے جبکہ تمام اسکولوں کا کمپیوٹرائزڈ ریکارڈ قبضے میں لے لیا ہے۔
خیال رہے کہ آل پاکستان پرائیویٹ اسکولز فیڈریشن نے فیس 20 فیصد کم کرنے اور موسم گرما کی پچاس فیصد فیس واپس کرنے سے متعلق سپریم کورٹ کا فیصلہ قبول کرنے کا اعلان کیا تھا۔
