اسلام آباد: مسلم لیگ ن کی سینٹرل آرگنائزنگ کمیٹی کے اجلاس میں عدالت سے نوازشریف کو سزا ہونے کی صورت میں عوامی رابطہ مہم چلانے کا فیصلہ کیا گیا۔
تفصیلات کے مطابق پارلیمنٹ ہاؤس میں نوازشریف اور شہبازشریف کی زیرصدارت ن لیگ کی سینٹرل آرگنائزنگ کمیٹی کا اجلاس ہوا۔
اجلاس میں پارٹی شاہد خاقان عباسی، ایازصادق، حمزہ شہباز، احسن اقبال، راناتنویر، آصف کرمانی،عبد القادربلوچ، مریم اورنگزیب نے شرکت کی۔
ذرائع کے مطابق اجلاس میں عدالت سے نواز شریف کوسزا کی صورت میں عوامی رابطہ مہم چلانے کا فیصلہ کیا گیا، عوامی رابطہ مہم کی قیادت حمزہ شہبازشریف کریں گے۔
ذرائع کا کہنا ہے کہ ن لیگ کی عوامی رابطہ مہم کا آغاز30 دسمبرسے باقاعدہ شروع ہوگا، 30 دسمبر کولاہورمیں مسلم لیگ ن کا یوم تاسیس منعقد کیا جائے گا۔
ذرائع کے مطابق یوم تاسیس سے حمزہ شہبازاورپارٹی کی سینئرقیادت خطاب کرے گی، اپوزیشن کی دیگرجماعتوں سے بھی رابطے ہوں گے۔
اس سے قبل اسپیکرقومی اسمبلی اسد قیصر نے ن لیگ کوکمیٹی روم نمبر2 میں اجلاس سے روک دیا تھا جس کے بعد نوازشریف کی زیرصدارت ن لیگ کا اجلاس اپوزیشن چیمبرمیں ہوا۔
نواز شریف کے گارڈز کا کیمرا مین پر تشدد، ایک گارڈ گرفتار، دوسرا فرار
یاد رہے کہ تین روز قبل پارلیمنٹ ہاؤس میں مسلم لیگ ن کے پارلیمانی اجلاس کے بعد کوریج کرنے والے صحافیوں کو نواز شریف کے اسکواڈ نے دھکے دیے اور دو کیمرا مینوں پر تشدد کیا تھا۔
بعدازاں کیمرا مین کو زخمی کرنے والے نواز شریف کے گارڈ کو پولیس کے حوالے کر دیا گیا تھا، تشدد کرنے والا گارڈ پارلیمنٹ کی سیکورٹی کی حراست میں تھا۔
