اسلام آباد: وزیراعظم نے کہا ہے کہ آج کے فیصلے سے سچ سامنے آگیا، عوام کا پیسہ بے دردی سے لوٹا گیا.
ان خیالات کا اظہار وزیر اعظم نے پی ٹی آئی رہنماؤں کے اجلاس کی صدارت کرتے ہوئے کیا، انھوں نے کہا کہ احتساب کے لئے 22 سال تک جدوجہد کی ہے.
وزیر اعظم کا کہنا تھا کہ احتساب کا عمل اب رکنے نہیں دیں گے، احتساب کا نظام مضبوط مؤثر اور شفاف بنائیں گے.
وزیر اعظم عمران خان کا کہنا تھا کہ عدالتی فیصلے سے سچ سامنے آگیا، پاکستان میں غریب غریب سے غریب تر ہوگئے، امیر بیرون ملک جائیدادیں بناتے رہے.
ان کا کہنا تھا کہ 10سال میں 24 ہزار ارب روپے قرضہ لیا گیا، بڑے قرضوں کے باوجود عوام کی حالت پرکوئی فرق نہیں پڑا، احتساب کاعمل ملکی ترقی کے لیے ضروری ہے.
مزید پڑھیں: العزیزیہ ریفرنس: نوازشریف کو سات سال قید کی سزا، کمرہ عدالت سے گرفتار
اس اہم اجلاس میں فواد چوہدری، افتخار درانی، عثمان ڈار، نعیم الحق، شیریں مزاری، شہریار آفریدی، شہزاد اکبر،علیم خان شریک ہوئے.
وزیراعظم عمران خان کا احتساب عدالت کے فیصلے پر اطمینان کا اظہار کیا، وزیراعظم کو سپریم کورٹ میں زیرسماعت مقدمات پربھی بریفنگ دی گئی.
یاد رہے کہ سابق وزیراعظم نوازشریف کے خلاف العزیزیہ اسٹیل ملز اور فلیگ شپ ریفرنسز کا فیصلہ سنادیا گیا ہے، نواز شریف کو العزیزیہ میں مجرم قرار دیتے ہوئے گرفتار کرلیا.
