لاہور: ملک کے مختلف شہروں میں شدید دھند کے باعث موٹرویز بند کردی گئیں، شہریوں کو محتاط رہنے کی ہدایت کی گئی ہے۔
تفصیلات کے مطابق پنجاب اور خیبرپختونخوا کے میدانی علاقوں جبکہ بالائی سندھ میں دھند کی چادر تن گئی، جس کے باعث نظام زندگی مفلوج ہے۔
خیبرپختونخواہ میں موٹروے اور نیشنل ہائی وے پر حد نظر کم ہے، موٹروے ایم ون پشاور سے رشکئی تک ٹریفک کے لیے بند کردی گئی۔
موٹروے انتظامہ کے مطابق موٹروے ایم ٹو لاہور سے کوٹ مومن اور فیصل آباد سے گوجرہ تک بھی ٹریفک کے لیے بند ہے۔
انتظامیہ کا کہنا ہے کہ دوران سفر فوگ لائٹس کا استعمال ضرور کریں اور بلاضرورت سفر کرنے سے بھی گریز کیا جائے۔
خیال رہے کہ گذشتہ ہفتے پنجاب میں شدید دھند نے نظام زندگی درہم برہم کردی تھی۔
شیخوپورہ، فیصل آباد، گوجرہ، پنڈی بھٹیاں اور سکھیکی میں شدید دھند کے باعث موٹروے ایم 2 پنڈی بھٹیاں سے شیخوپورہ تک بند رہی تھی۔
علاوہ ازیں کوئٹہ، قلات اور دیر میں سردی میں مزید اضافے کی توقع ہے، جبکہ کراچی، حیدرآباد، سکھر، گوجرانولہ، سرگودھا، فیصل آباد، لاہور، ملتان، ڈی جی خان، ساہیوال اور بہاولپور میں صبح اور رات کے اوقات میں دھند متوقع ہے۔
