اسلام آباد: سابق سفیر عبدالباسط نے کہا ہے کہ بھارت میں صورت حال مزید بگڑے گی، پانچ ریاستوں میں بی جے پی کو مکمل طور پر ناکامی ہوئی ہے۔
تفصیلات کے مطابق بھارت میں پاکستان کے سابق سفیر عبدالباسط نے کہا کہ انتہا پسند ہندوؤں کو ایک جگہ پر جمع ہونے کی ترغیب دی جارہی ہے، ہمیں بی جے پی کی اس قسم کی پالیسی سے چوکنا رہنے کی ضرورت ہے۔
سابق سفیر کے مطابق ہمیں وقتاً فوقتاً بھارت کے اصل چہرہ کو بے نقاب کرنا چاہئے، بی جے پی انتہا پسند تنظیم آر ایس ایس کا سیاسی ونگ ہے، آر ایس ایس کی مسلمانوں کے خلاف تاریخ ہے، اب بھی ظلم جاری ہے۔
عبدالباسط نے کہا کہ اترپردیش میں وزیراعلیٰ بھی آر ایس ایس کی صوابدید ہے، وزیراعلیٰ اترپردیش کے مسلمانوں کے خلاف اقدامات دیکھ چکے ہیں۔
انہوں نے کہا کہ ایسے شہروں کے نام تک تبدیل کردئیے جن کا مسلمانوں سے تعلق تھا، گائے کے نام پر آئے روز مسلمانوں کو قتل کیا جارہا ہوتا ہے۔
واضح رہے کہ بی جے پی کے رہنما سبرا منیم سوامی نے اپنی ہی حکومت کی پالیسی کا بھانڈا پھوڑتے ہوئے کہا تھا کہ مودی سرکار عام انتخابات میں مسلمان مخالف جذبات کو ہوا دے گی۔
یاد رہے کہ آج بھی بھارتی ریاست بہار میں گائے چوری کرنے کے الزام میں 55 سالہ بزرگ محمد کابل کو قتل کردیا گیا، مقتول مدد کی اپیل کرتا رہا مگر کوئی مدد کو نہ پہنچا اور وہ زخموں کی تاب نہ لاتے ہوئے دم توڑ گیا۔
