کراچی: شہرِ قائد کو تجاوزات سے پاک کرنے کا مشن زور شور سے جاری ہے، چڑیا گھر کے اطراف تجاوزات اور غیر قانونی تعمیرات گرانے کے لیے دوسرے روز بھی کارروائی جاری رہی۔
تفصیلات کے مطابق چڑیا گھر کے اطراف کئی عشروں سے قائم 400 سے زائد دکانیں بھاری مشینری کی مدد سے گرا دی گئیں، کمشنر کے ایم سی کہتے ہیں کہ گرینڈ آپریشن کل تک مکمل کر لیا جائے گا۔
[bs-quote quote=”چڑیا گھر کے اطراف کئی عشروں سے قائم 400 سے زائد دکانیں بھاری مشینری کی مدد سے گرا دی گئیں۔” style=”style-7″ align=”left” color=”#dd3333″][/bs-quote]
انتظامیہ نے غیر قانونی تعمیرات کے خلاف سخت رویہ اپنا لیا ہے، چڑیا گھر کی دیوار کے ساتھ 400 سے زائد دکانیں غیر قانونی طور پر تعمیر کی گئی تھیں، اس وقت ملبہ اٹھانے کا کام جاری ہے۔
کے ایم سی کا عملہ ہیوی مشینری کی مدد سے آپریشن میں مصروف ہے، کمشنر کے ایم سی کا کہنا ہے کہ باہر غیر قانونی دکانوں کی مسماری کے بعد چڑیا گھر کے اندر موجود غیر قانونی تعمیرات کو بھی گرایا جائے گا۔
انتظامیہ نے چڑیا گھر کے احاطے میں بنے گھر خالی کرنے کے نوٹس بھی جاری کر دیے ہیں۔
یہ بھی پڑھیں: ایس بی سی اے کا غیر قانونی تعمیرات میں ملوث افسران کے خلاف کارروائی کا حکم
خیال رہے کہ سپریم کورٹ کی جانب سے انتظامیہ کو شہرِ قائد میں غیر قانونی عمارتوں کے خلاف سخت کارروائی کے حکم پر ایس بی سی اے نے بھی غیر قانونی تعمیرات میں ملوث افسران کے خلاف کارروائی کا حکم جاری کر دیا ہے۔
سندھ بلڈنگ کنٹرول اتھارٹی نے شہر میں غیر قانونی تعمیرات میں ملوث محکمے کے افسران کے خلاف سخت کارروائی کا حکم دیتے ہوئے افسران کی نشان دہی کے لیے 2 رکنی کمیٹی بھی قائم کر دی۔
