کراچی: سابق گورنر سندھ محمد زبیر کا کہنا ہے کہ کل کے واقعے کے بعد سے مجھے ابھی تک سیکیورٹی فراہم نہیں کی گئی۔
تفصیلات کے مطابق گذشتہ روز سابق گورنرسندھ محمد زبیر کو گھر جاتے ہوئے کار سوار مسلح افراد نے روکنے کی کوشش کی تھی، بعد ازاں ملزمان فرار ہوگئے تھے۔
اے آر وائی نیوز سے خصوصی گفتگو کرتے ہوئے محمد زبیر نے کہا کہ مجھ سے صرف پولیس نے سیکیورٹی کی بات کی، سیاسی رہنماؤں کو سیکیورٹی دینی ہے یا نہیں، طےکرنا ریاست کا کام ہے،
انہوں نے کہا کہ اگر کوئی بڑا واقعہ رونما ہوتا ہے تو پاکستان کا امیج دنیا میں اچھا نہیں جاتا، پولیس کی تحقیقات سے مطمئن ہوں، علی رضاعابدی کے واقعے کے بعد امن وامان خراب ہوا اور پاکستان کا امیج دنیا میں خراب گیا۔
پوچھے گئے سوال پر سابق گورنر سندھ کا کہنا تھا کہ جب میں گورنر تھا تب مجھے دھمکی آمیز کالز آتی تھیں، میں کراچی آپریشن کا اہم حصہ تھا، ظاہر ہے میرے کئی دشمن ہں گے، سیاسی نظریے کی وجہ سے بھی میرے کئی دشمن ہیں۔
کراچی: مسلح افراد کی سابق گورنرسندھ محمدزبیر کو روکنے کی کوشش، تحقیقات شروع
ان کا مزید کہنا تھا کہ گورنرشپ چھوڑنے کے بعد بھی سیاسی مؤقف چھوڑنے کا پیغام ملتا تھا، کبھی پیار محبت تو کبھی سخت لہجے میں بات پہنچائی جاتی تھی۔
خیال رہے کہ گذشتہ روز سابق گورنر سندھ محمد زبیر اپنی اہلیہ کے ساتھ گاڑی میں گھر جارہے تھے کہ کراچی کے پوش علاقے ڈیفنس فیز6 میں کار سوار افراد نے انہیں روکنے کی کوشش کی تھی۔
