ریاض: سعودی پولیس نے قطیف میں کامیاب کارروائی کرتے ہوئے 6 مشتبہ افراد کو ہلاک کردیا۔
عرب میڈیا کے مطابق دو روز قبل جش کے علاقے میں دہشت گردوں کے ٹھکانے پر حملے کے دوران ایک شخص کو زخمی حالت میں گرفتار کرلیا گیا۔
رپورٹ کے مطابق سعودی عرب کے مشرقی صوبے قطیف میں ترقیاتی منصوبے پر حملے کو ناکام بنانے کے دوران کیے گئے آپریشن میں 5 افسران زخمی بھی ہوئے جنہیں طبی امداد کے لیے اسپتال منتقل کردیا گیا ہے۔
دوسری جانب انسانی حقوق کی تنظیم کا کہنا ہے کہ ان کے پاس سعودی فورسز کے علاقے میں داخل ہوکر اس کا گھیراؤ کرکے قبضہ کرنے کے شواہد موجود ہیں۔
مزید پڑھیں: سعودی پولیس کی کارروائی، 35 سال سے زنجیروں میں جکڑا ذہنی مریض بازیاب
سعودی حکام کی جانب سے دہشت گردوں اور منشیات کے اسمگلروں کو عوامیہ کشیدگی کا ذمہ دار ٹھہرایا جاتا ہے۔
خیال رہے کہ سعودی عرب کا مشرقی صوبہ 2011 کے عرب انقلاب کے بعد سے کشیدگی کا شکار ہے، عرب انقلاب کے دوران مظاہرین نے حکومت کی جانب سے کی جانے والی تفریق کے خاتمے کا مطالبہ کیا تھا۔
اس احتجاجی تحریک کے رہنما نمر النمر کو 2016 میں دہشت گردی کو فروغ دینے کے الزام میں گرفتار کیا گیا تھا۔
نمر النصر کی گرفتاری کے بعد خلیجی ممالک سمیت ایران میں کشیدگی میں اضافہ ہوا تھا، بعدازاں سعودی حکام نے 2017 میں قطیف کے علاقے میں احتجاجی مرکز ضلع عوامیہ کا قبضہ حاصل کیا تھا۔
