سڈنی: آسٹریلوی اخبار نے دعویٰ کیا ہے کہ کرکٹ آسٹریلیا نے ممکنہ دورہ پاکستان سے معذرت کرلی ہے۔
تفصیلات کے مطابق آسٹریلوی اخبار نے دعویٰ کیا ہے کہ کرکٹ آسٹریلیا نے ممکنہ دورہ پاکستان سے معذرت کرلی اور موقف اختیار کیا ہے کہ ہماری حکومت نے دورہ پاکستان کی اجازت نہیں دی ہے۔
پاکستان کرکٹ بورڈ (پی سی بی) کا کہنا ہے کہ کرکٹ آسٹریلیا سے آفیشل جواب کا انتظار ہے، کرکٹ آسٹریلیا نے پی سی بی کی دعوت پر غور کی یقین دہانی کرائی تھی۔
چند روز قبل آسٹریلیا کے دو کھلاڑی عثمان خواجہ اور ایرون فنچ نے پاکستان میں کھیلنے پر رضامندی ظاہر کی تھی ان کا کہنا تھا کہ پاکستان میں کرکٹ کھیلنے میں کوئی مسئلہ نہیں ہے۔
مزید پڑھیں: آسٹریلوی کپتان ایرون فنچ اور عثمان خواجہ پاکستان میں کھیلنے کے لیے تیار
واضح رہے کہ پی سی بی نے آسٹریلیا کو پاکستان میں 2 ون ڈے میچز کھیلنے کی دعوت دی تھی، پی سی بی نے 7 جنوری کو کرکٹ آسٹریلیا کو پاکستان میں سیریز کھیلنے کی دعوت دی تھی۔
یاد رہے کہ پاکستان اورآسڑیلیا کے درمیان 5 میچوں کی سیریز 29 مارچ سے شروع ہونی ہے، پی سی بی نے آسٹریلیا کو سیریز کے ابتدائی 2 میچز پاکستان میں کھیلنے کی دعوت دی ہے.
یہ بھی یاد رہے کہ سیکیورٹی آفیسر پی ایس ایل کے میچزمیں سیکیورٹی کا جائزہ لے کر اپنی رپورٹ مرتب کریں گے.
خیال رہے کہ ملک میں امن و امان کی مخدوش صورت حال کی وجہ سے پاکستان میں بین الاقوامی کرکٹ کے دروازہ بند ہوگئے تھے، البتہ گذشتہ پی ایس ایل کے میچ پاکستان میں منعقد کرنے اور ویسٹ انڈیز کی ٹیم کی آمد کے بعد امکان پیدا ہوا ہے کہ جلد پاکستان میں عالمی کرکٹ کے دروازے کھل جائیں گے۔
