میکسیکوسٹی: امریکا میں بہتر روزگار اور خوشحال مستقبل کے حصول کے لیے تارکین وطن کا ایک اور قافلہ امریکی سرحد پر پہنچ گیا۔
تفصیلات کے مطابق امریکا میں پناہ کے حصول کیلئے تارکین وطن کا قافلہ ٹرک میں سوار ہوکر میکسیکو کے ساتھ لگنے والے امریکی بارڈر پر پہنچا، قافلے میں بچے اور خواتین بھی شامل ہیں۔
غیر ملکی خبر رساں ادارے کا کہنا ہے کہ وسطی امریکا سے تعلق رکھنے والے اس کارواں میں خواتین اور بچے بھی شامل ہیں، ان میں اکثریت ہنڈورس کے تارکین وطن کی ہے۔
امریکا کے شمال میں واقع ملک میکسیکو نے مہاجرین کو پناہ دے رکھی ہے، تاہم تارکین وطن کا کہنا ہے کہ وہ اپنے بچوں کے بہتر مسقبل کیلئے امریکا میں پناہ کے خواہاں ہیں۔
دوسری جانب امریکی صدر ڈونلڈ ٹرمپ مہاجرین کے امریکا داخلے پر شدید غم وغصے کا اظہار کرچکے ہیں، انہوں نے موقف اختیار کیا تھا کہ میکسیکو تارکین وطن کی روک تھام کے لیے کوئی اقدام نہیں کرتا جس کے باعث وہ غیرقانونی طور پر امریکا میں داخل ہوجاتے ہیں۔
مہاجرین کے خلاف سخت حکمت عملی، غیر قانونی طور پر امریکا میں داخل ہونے پر پابندی عائد
اسی بابت امریکی صدر میکسیکو سرحد پر دیوار کی تعمیر کا مطالبہ کررہے ہیں، انہوں نے مہاجرین کو ملکی سالمیت کے لیے خطرہ قرار دیا ہے۔
خیال رہے کہ گذشتہ سال نومبر میں امریکی صدر ڈونلڈ ٹرمپ نے پڑوسی ملک میکسیکو کی سرحد سے غیرقانونی طور پر امریکا میں داخل ہونے والے تارکین وطن کو سنگین نتائج کی دھمکی دی تھی۔
انہوں نے کہا تھا کہ میکسیکو کی سرحد سے غیرقانونی طور پر امریکا میں داخل ہونے والے تارکین وطن کو دھمکی دیتے ہوئے کہا ہے کہ میکسیکو کی سرحد سے دراندازی کرنے والے امریکی فوج پر حملہ کرنے والوں پر گولیاں چلائی جائیں گی۔
