فیصل آباد: وزیر ریلوے شیخ رشید احمد نے کہا ہے کہ میری دعا ہے کہ اللہ تعالیٰ عمران خان کو کامیاب کرے، آؤ مل کر سچ کا ساتھ دیں، عمران خان کو آپ کے ساتھ کی ضرورت ہے۔
تفصیلات کے مطابق وزیر ریلوے شیخ رشید احمد نے میڈیا سے گفتگو کرتے ہوئے کہا کہ وزیراعظم عمران خان عوام کے لیے بہت محنت کررہے ہیں، آج پاکستان کی معیشت کو عمران خان دن رات ٹھیک کررہے ہیں۔
شیخ رشید نے کہا کہ میں دو نمبر وزیر نہیں، کافی سال وزیر رہا ہوں، عمران خان جیسا شخص نہیں دیکھا، ہمیں ملک کے لیے ساتھ کھڑا ہونا ہوگا، عمران خان کا ساتھ دینا ہوگا۔
وزیر ریلوے نے کہا کہ ملک ایک بہت بڑے امتحان سے گزر رہا ہے، پاکستان معاشی طور پر بہت کمزور ہے، آئندہ دو سے تین ماہ بوجھ پڑے گا، ہمارے پاس پیسوں کی کمی ہے جو کما رہے ہیں وہی لگا رہے ہیں۔
مزید پڑھیں: شہبازشریف اسپیکر کے قدموں میں گرا ہوا ہے کہ شیخ رشید پی اے سی میں نہ آئے، شیخ رشید
انہوں نے کہا کہ میں نمبر ون سے دوستی کرتا ہوں اور نمبر ون سے دشمنی کرتا ہوں، یہ لوگ 40 سال سے حکمرانی کرتے آرہے ہیں، وزیراعظم عمران خان کو 40 دن تو دیں۔
شیخ رشید نے کہا کہ فریال تالپور ہو یا کوئی بھی ان کو آئینہ نظر آرہا ہے، جس ادارے کو دیکھو وہاں کرپشن نظر آتی ہے، چالیس سال سے نواز شریف اور آصف علی زرداری پاکستان کو لوٹ رہے ہیں۔
واضح رہے کہ شیخ رشید احمد کا کہنا تھا کہ عمران خان نے ملک دیوالیہ ہونے سے بچالیا ہے، ماضی کے وزرائے اعظم کو صرف قرض لینے کی فکر رہتی تھی، عمران خان کی دوستی اور محبت میں خاموش ہوں۔
