اسلام آباد: وفاقی حکومت نے شجر کاری مہم ’پلانٹ فار پاکستان‘ مہم کی تیاریاں مکمل کرلیں، وزیر اعظم عمران خان کل بلوکی میں مہم کا آغاز کریں گے۔
تفصیلات کے مطابق وزیر اعظم کے مشیر برائے ماحولیات ملک امین اسلم نے شجر کاری سائٹ کا دورہ کیا۔ اس موقع پر ان کا کہنا تھا کہ حکومت 3 ماہ میں 15 کروڑ درخت لگائے گی۔
مشیر ماحولیات کا کہنا تھا کہ لاہور میں قبضہ مافیا سے 25 سو ایکڑ زمین واگزار کروا لی گئی، ملکی تاریخ میں پہلی بار قبضہ چھڑا کر جنگل آباد کیا جا رہا ہے۔
انہوں نے کہا کہ عوام سے کیا گیا سرسبز پاکستان کا وعدہ پورا کر رہے ہیں، عوام سے گزارش ہے کہ بڑھ چڑھ کر شجر کاری مہم میں حصہ ڈالیں، جنگل لاہور کے اسموگ جیسے مسائل ختم کر سکے گا۔
خیال رہے کہ پاکستان تحریک انصاف کی حکومت ماحولیاتی مسائل سے نمٹنے کے لیے کوشاں ہے اور اس سلسلے میں سنجیدہ اقدامات کیے جارہے ہیں جن میں وسیع پیمانے پر شجر کاری بھی شامل ہے۔
گزشتہ برس اکتوبر میں وزیر اعظم عمران خان نے کلین اینڈ گرین پاکستان مہم کا آغاز کیا تھا، اس موقع پر وزیر اعظم کا کہنا تھا کہ پاکستان کو درختوں کی بہت ضرورت ہے، 5 سال بعد پاکستان یورپ سے زیادہ صاف نظر آئے گا۔
ایک اور شجر کاری مہم ’پلانٹ فار پاکستان‘ کا کل 9 فروری سے آغاز کیا جارہا ہے جس کا آغاز وزیر اعظم عمران خان کریں گے۔
کل کے روز پورے پاکستان میں 25 لاکھ پودے لگائے جائیں گے جبکہ 3 ماہ میں 15 کروڑ درخت لگانے کا ہدف رکھا گیا ہے۔
