بینکاک: تھائی لینڈ کی شہزادی یبول ریتنا نے شاہی روایات توڑتے ہوئے وزیراعظم کے عہدے کے لیے انتخابات میں حصہ لینے کا اعلان کردیا۔
تفصیلات کے مطابق سیاست سے دور رہنے والے تھائی لینڈ کے شاہی خاندان کی شہزادی نے وزیراعظم کے عہدے کے لیے انتخابات میں حصہ لینے کا اعلان کر کے شاہی روایات کو توڑ دیا۔
تھائی لینڈ کی تاریخ میں اب تک شاہی خاندان سیاست سے دور ہی رہا ہے تاہم شہزادی نے انتخابی دنگل میں حصہ لینے کا غیر معمولی اعلان کر کے سب کو حیران کردیا۔
تھائی لینڈ میں رواں برس چوبیس مارچ کو انتخابات ہوں گے، تھائی لینڈ کے موجودہ بادشاہ کی سب سے بڑی بہن سرسٹھ سالہ شہزادی اتحادی جماعت تھائی رسکا چارٹ کی مشترکہ امیدوار ہوں گی۔
دوسری جانب تھائی لینڈ کے بادشاہ مہا وجیرل ونگ کورن نے اس اقدام پر شہزادی کو تنقید کا نشانہ بنایا ہے، ان کا کہنا ہے کہ میری بڑی ہمشیرہ وزیراعظم کے لیے انتخابات میں حصہ لے رہی ہیں جو نامناسب اور شاہی خاندانی روایات کے خلاف ہے۔
ان کا کہنا تھا کہ یبول ریتنا کے لیے یہ مختصر سا سیاسی سفر ہوگا، شاہی خاندان کے رسم ورواج کو توڑنا انتہائی نامناسب ہے۔
دوسری جانب شہزادی نے سوشل میڈٰیا پر اپنی خوشی کا اظہار کرتے ہوئے اپوزیشن پارٹی رکسا چارٹ کی جانب سے وزیراعظم کے لیے امیدوار منتخب کرنے پر ان کا شکریہ ادا کیا۔
خیال رہے کہ تھائی لینڈ کی شہزادی یبول ریتنا نے شاہی خاندان کی روایت توڑ کر 1972 میں امریکی شہری سے شادی کی تھی تاہم ازدواجی زندگی کامیاب نہ ہوسکی اور 1990 میں طلاق کے بعد وہ دوبارہ وطن لوٹیں اس دوران شاہی خاندان نے ان سے شاہی منصب بھی چھین لیا تھا۔
