کراچی : ون ڈے سیریز میں سولہ سال بعد ویسٹ انڈیز کو شکست دینے والی پاکستان ویمن ٹیم کی کھلاڑیوں کی وطن واپسی کا آغاز ہوگیا، کراچی ایئر پورٹ پر کوئی آفیشل ان کے استقبال کو نہیں آیا۔
تفصیلات کے مطابق ون ڈے سیریز میں شاندار کامیابی کے بعد پاکستان ویمنز کرکٹ ٹیم کی کھلاڑیوں کی دبئی سے وطن واپسی کا سلسلہ شروع ہوگیا، جویریہ ودود، ناہیدہ بی بی، کائنات امتیاز، اومامہ سہیل اور ایمن انور ٹیم مینجر عبدالرقیب کے ساتھ دبئی سے واپس کراچی پہنچ گئیں۔
ایئر پورٹ پر پی سی بی حکام یا کوئی نامور شخصیات میں سے کھلاڑیوں کے استقبال کیلئے موجود نہیں تھا، کھلاڑیوں کے اہل خانہ نے ان کا پرتپاک استقبال کیا اور پھولوں کے ہار پہنائے۔
اس موقع پر اے آر وائی نیوز کے نمائندے علی حسن سے گفتگو کرتے ہوئے قومی ٹیم کی کھلاڑی جویریہ ودود خان نے کہا کہ ٹیم کی محنت کا ہی نتیجہ ہے کہ ہم نے ویسٹ انڈیز کے خلاف تاریخ ساز کامیابی سمیٹی، پہلے میچ میں پلان پر صحیح سے عمل نہ کرسکے جس کی وجہ سے شکست ہوئی، اگلی مرتبہ ویسٹ انڈیز کی ان فارم بیٹرز کو ٹارگٹ بنایا اور کامیاب رہے۔
جویریہ ودود کا مزید کہنا تھا کہ دبئی میں وکٹ اسپنرز کیلئے نہیں بلکہ سیمرز کے لیے ساز گار تھی، ایسی وکٹوں پر کھیلنے کا تجربہ جنوبی افریقہ میں کام آئے گا، دورہ جنوبی افریقہ میں ایک ماہ کا عرصہ باقی رہ گیا ہے اور ایک ماہ کے دوران ہم جنوبی افریقہ کیخلاف سیریز کی تیاری مکمل کرلیں گے۔
ایک سوال کے جواب میں انہوں نے کہا کہ میں پاکستان ٹیم کی سپر اسٹار نہیں ہوں میرا کام صرف ٹیم کے لیے اچھے نتائج دینا ہے، گزارش ہے کہ مینز ٹیم کے ساتھ پاکستان ویمنز ٹیم کی حوصلہ افزائی بھی کرنی چاہیے۔
واضح رہے کہ پاکستان نے ویسٹ انڈیز کو ون ڈے سیریز میں1-2 سے زیر کیا، پاکستان وومن ٹیم نے سولہ سال کے عرصے میں پہلی مرتبہ ویسٹ انڈیز کو ون ڈے سیریز میں شکست دی ہے۔
