کراچی : بھارتی کسانوں کی جانب سے پاکستان کو ٹماٹر نہ دینے کا اعلان سوشل میڈیا پر مذاق بن گیا، پاکستانیوں نے دلچسپ قوالی گا کر مودی سرکار کے ٹماٹر مسترد کردئیے۔
تفصیلات کے مطابق پلوامہ حملے کے بعد بھارت کی جانب سے پاکستان پر بے جا الزام تراشیوں کا سلسلہ جاری ہے، اس حوالے سے سوشل میڈیا پر بھی ایک جنگ کا سماں ہے۔
اس کے علاوہ بھارتی میڈیا بھی زور شور سے پاکستان کیخلاف بے بنیاد رپورٹس نشر کر کے اپنی عوام کو گمراہ کررہا ہے۔ اسی رو میں بہہ کر بھارت کے کسانوں نے پاکستان کیخلاف بنائی گئی ایک ویڈیو میں کہا کہ ہم پاکستان کو ٹماٹر نہیں دیں گے کیونکہ وہ ہمارے ٹماٹر کھا کر ہمارے ہی فوجی مارتے ہیں۔
بھارتی کسانوں کا ٹماٹر نہ دینے کا اعلان سوشل میڈیا پر مذاق بن گیا، مذکورہ ویڈیو سوشل میڈیا پر وائرل ہوئی جس کو پاکستانی نیوز چینلز پر بھی دکھایا گیا۔
اس ویڈیو کے جواب میں پاکستانی بھی کہاں پیچھے رہنے والے تھے انہوں نے بھی دلچسپ قوالی گا کر مودی سرکار کے ٹماٹر مسترد کردئیے، قوالی کے بول ہیں کہ تم اپنے ٹماٹر پاس اپنے رکھو، ہمیں ان کی کوئی ضرورت نہیں ہے۔
