بیجنگ: چینی وزارت خارجہ کے ترجمان کا کہنا ہے کہ توقع ہے پاکستان اوربھارت تحمل سے کام لیں گے اور ایسے اقدامات کریں گے، جس سے خطے میں استحکام آئے اور باہمی تعلقات بہترہو۔
تفصیلات کے مطابق پاکستان اور بھارت کے درمیان موجودہ صورتحال پر چین میدان میں آگیا ، چینی وزارت خارجہ کے ترجمان نے بیان میں کہا ہے توقع ہے پاکستان اور بھارت تحمل سے کام لیں گے۔
ترجمان کا کہنا تھا امید ہے پاکستان اور بھارت ایسے اقدامات کریں گے، جس سے خطے میں استحکام آئے اورباہمی تعلقات بہترہوں۔
یاد رہے چند روز قبل بھی ترجمان چینی وزارت خارجہ گینگ شوانگ نے بریفنگ میں کہا تھا کہ چین کا علاقائی امن و سلامتی اور پاک بھارت مستحکم تعلقات پر بہت انحصار ہے، امید ہے دونوں ممالک تحمل سے کام لیتے ہوئے مذاکراتی راہ اختیار کریں گے۔
مزید پڑھیں : پاکستان اور بھارت کے درمیان امن خطے کے استحکام کے لیے ضروری ہے: چین
ترجمان چینی وزارت خارجہ کا کہنا تھا کہ پاکستان اور بھارت خطے کے اہم ملک ہیں، دونوں ممالک مذاکرات کے ذریعے جلد از جلد اپنے مسائل کو حل کرنے کی کوشش کریں، دونوں ممالک کے درمیان قیام امن خطے کے استحکام کیلیے بہت ضروری ہے۔
واضح رہے بھارتی ایئرفورس کی جانب سے لائن آف کنٹرول کی خلاف ورزی کی گئی ، پاک فضائیہ کی بروقت ردعمل کے بعد بھارتی طیارے فرار ہوگئے تھے۔
مزید پڑھیں : لائن آف کنٹرول کی خلاف ورزی، پاک فضائیہ کا بھرپور جواب، بھارتی طیارے بھاگ گئے
ڈی جی آئی ایس پی آر میجرجنرل آصف غفور کا کہنا تھا کہ بھارتی طیاروں نے مظفرآباد سیکٹر سے دراندازی کی کوشش کی اور مظفر آباد سیکٹر میں تین سے چارمیل اندر آئے، بھارتی طیاروں نے جلد بازی میں اپنا پے لوڈ کھلے علاقے میں گرایا، تاہم پے لوڈ گرنے سے کوئی جانی یا مالی نقصان نہیں ہوا۔
