نئی دہلی: پاک فضائیہ کے شاہینوں کے ہاتھوں بھارتی فضائیہ کی زبردست شکست کے بعد بھارتیہ جنتا پارٹی اور وزیرِ اعظم مودی کے خلاف بھارت کی 21 جماعتوں نے اتحاد کر لیا ہے۔
تفصیلات کے مطابق فضائی مقابلے میں پاکستانی شاہینوں نے بھارتی فضائیہ کو خاک چٹا دی ہے، اب بھارتی وزیرِ اعظم مودی کے سر پر انتخابات میں بھی بد ترین شکست کا خطرہ منڈلانے لگا ہے۔
انڈین ایئر فورس کی شکست دیکھ کر بی جے پی اور مودی کے خلاف بھارت کی اکیس جماعتوں نے اتحاد کر لیا ہے، اپوزیشن اتحاد کا کہنا ہے کہ مودی فوج کو اپنے مقاصد کے لیے استعمال کر رہا ہے۔
بھارتی وزیرِ اعظم اپوزیشن کو اعتماد میں نہیں لیتے، اپوزیشن اتحاد نے مطالبہ کیا کہ نریندر مودی فوری طور پر بھارت کے عوام کو اعتماد میں لیں۔
یاد رہے کہ آج مودی حکومت کے خلاف انڈیا میں اپوزیشن پارٹیوں کا اجلاس طلب کیا گیا تھا جس میں سابق صدر منموہن سنگھ، سونیا گاندھی، اور کانگریس کے صدر راہول گاندھی و دیگر نے شرکت کی۔
یہ بھی پڑھیں: پاکستانی قیدی: بھارتی پائلٹ پاک فوج کا شکر گزار
اکیس جماعتوں کے مشترکہ اعلامیے میں مودی حکومت پر سخت تنقید کی گئی، کہا گیا کہ مودی کے تنگ سیاسی خیالات سے چھٹکارا حاصل کرنا ہوگا۔
خیال رہے کہ آج پاکستان کی فضائی حدود کی خلاف ورزی کی صورت میں ایک بھارتی پائلٹ کو زندہ گرفتار کر لیا گیا ہے، بھارتی پائلٹ ابھے نندن نے کہا کہ پاک فوج کا رویہ پیشہ ورانہ اور متاثر کن ہے ہماری فوج کو ایسا رویہ اپنانا چاہیے۔
