راملہ: اسرائیلی فورسز نے فائرنگ کرکے 3 فلسطینی نوجوانوں کو شہید کردیا، فلسطین کی وزارت صحت نے فلسطینی نوجوانوں کی شہادت کی تصدیق کردی۔
غیرملکی خبررساں ادارے کے مطابق اسرائیلی فوج نے نابلس میں 16 سالہ عمر کو سرچ آپریشن کے دوران فائرنگ کرکے شہید کیا جس پر فلسطینیوں نے احتجاج کیا تو اسرائیلی فورسز نے مظاہرین پر فائرنگ کرتے ہوئے 2 مزید فلسطینی نوجوانوں کو شہید کردیا۔
وزارت صحت نے تصدیق کی ہے کہ 16 سالہ نوجوان عمر کو گرفتاری کے دوران مزاحمت کرنے پر فائرنگ کرکے شہید کیا گیا جبکہ دیگر 2 نوجوان عمر کی شہادت پر احتجاجی مظاہرے میں شریک تھے۔
دوسری جانب قابض اسرائیلی فورسز کا کہنا ہے کہ عمر نامی نوجوان یہودیوں کو قتل کرنے والی ٹیم میں شامل تھا جو بارودی مواد کے ساتھ فرار ہوکر چھپ گیا تھا۔
مزید پڑھیں: رملہ میں یہودی بلوائیوں کی فائرنگ، 1 فلسطینی شہید، درجنوں زخمی
اسرائیلی فورسز کے مطابق چھاپے کے دوران فلسطینیوں کی جانب سے فائرنگ کی گئی جوابی فائرنگ میں دو نوجوان مارے گئے۔
واضح رہے کہ دو روز قبل اسرائیل میں ایک حملے میں دو اسرائیلی ہلاک ہوگئے تھے، اسرائیلی فوج نے حملے کا ذمہ دار فلسطینی نوجوان کو قرار دیتے ہوئے رملہ کے ایک گاؤں میں چھاپا مار کارروائی کی تھی۔
یاد رہے کہ دو ماہ قبل راملہ میں یہودی بلوائیوں کی فائرنگ سے ایک فلسطینی شہید جبکہ درجنوں زخمی ہوگئے تھے۔
خیال رہے کہ غیور فلسطینیوں نے 30 مارچ 2018 کو ’تحریک حق واپسی‘ کے تحت غزہ کی پٹی پر احتجاجی مظاہروں کا آغاز کیا تھا، فلسطینی شہری ہر جمعے اسرائیلی سرحد پر جمع ہوکر غزہ کی صیہونی مظالم اور غزہ کی ناکہ بندی کے خلاف مظاہرہ کرتے ہیں۔
