بہاولپور : اے آر وائی نیوز کے معروف پروگرام سرعام کے میزبان اقرار الحسن اور اُن کی ٹیم نے تعلیم کے فروغ کے لیے ملک گیر تحریک کا آغاز بہاولپور سے کردیا، مہم کے تحت خستہ حال سرکاری اسکولوں کی حالت زار کو بہتر بنایا جائے گا۔
تفصیلات کے مطابق خستہ حال سرکاری اسکولوں کی حالت بدلنے کے مشن کے تحت اے آر وائی نیوز کی ٹیم سرعام نے یوم پاکستان کے موقع پر بہاولپور میں کنونشن کا اہتمام کیا جس میں ہزاروں جانبازوں نے شرکت کی۔
Pakistan we need your support for this awesome cause led by @iqrarulhassan for the future of our nation. So Bahawalpur make sure you are present tmrw to join #TeamSareAam and make a true difference. #یومِ_تعلیمِ_پاکستان pic.twitter.com/DUbSARIkmG
— Fakhr-e-Alam (@falamb3) March 22, 2019
اقرارالحسن نے کنونشن سے خطاب میں کہا کہ ملک کے خستہ حال سرکاری اسکولوں کی حالت بدلیں گے، پسماندہ علاقوں کے سرکاری اسکولوں کو جدید سہولتوں سے آراستہ کریں گے۔
ان کامزید کہنا تھا کہ اسکولوں کے ٹیچنگ اسٹاف کی اعلیٰ معیار کی تربیت پرتوجہ دی جائے گی، اس کے علاوہ ٹیم سرعام تعلیم پاکستان تحریک کے لیے کسی سے عطیہ نہیں لے گی۔
یاد رہے کہ معاشرے کی برائیوں کو بے نقاب کرنے اور عوام تک حقیقت پہنچانے والے اے آر وائی کے پروگرام سرعام کے اینکر اقرار الحسن گزشتہ دو برس سے یومِ قائد میں وال چاکنگ ختم کرنے کی کامیاب مہم بھی چلا چکے ہیں۔
