کراچی: قومی کرکٹ ٹیم کے کپتان سرفراز احمد نے کہا ہے کرکٹ کو مزید مضبوط بنانے کے لیے محنت کررہے ہیں۔
تفصیلات کے مطابق قومی کرکٹ ٹیم کے کپتان سرفراز احمد نے جامعہ کراچی کا دورہ کیا، اس موقع پر انہوں نے ملک میں کرکٹ کے فروغ اور مضبوطی سمیت کئی پہلوؤں پر گفتگو کی۔
پی ایس ایل فور ٹائٹل کی جیت پر تبصرہ کرتے ہوئے ان کا کہنا تھا کہ ٹیم کی جیت پر بہت پیار ملا، پورے ملک کا شکر گزار ہوں۔
سرفراز احمد کا کہنا تھا کہ وہ مسلسل اور انتھک محنت پر یقین رکھتے ہیں، کچھ عرصے قبل وہ ٹیم کا حصہ نہیں تھے لیکن آج کپتان ہیں۔
ان کا مزید کہنا تھا کہ نوجوان عملی زندگی میں آنے کے بعد اپنے مادرعلمی کو ہرگز نہ بھولیں۔
دو روز قبل یوم پاکستان کے موقع پر کپتان قومی کرکٹ ٹیم سرفراز احمد کوئٹہ پہنچے اور پی ایس ایل کی ٹرافی کے ساتھ یوم پاکستان اور پی ایس ایل کی جیت کا جشن منایا۔
کوئٹہ: سرفراز احمد نے منایا یوم پاکستان کا جشن پی ایس ایل کی ٹرافی کے ہمراہ
واضح رہے کہ پی ایس ایل سیزن فور میں کوئٹہ گلیڈی ایٹرز کی ٹیم نے پہلی بار ٹرافی اپنے نام کی تھی اور پشاور زلمی کو باآسانی شکست سے دوچار کیا تھا۔
