ملتان : ملتان کے ضمنی انتخاب میں تحریک انصاف کو فتح مل گئی، پی ٹی آئی کے واصف راں کامیاب قرار پائے جبکہ ان کے مد مقابل پی پی امیدوار ملک ارشدراں دوسرے نمبر پر رہے۔
تفصیلات کے مطابق پنجاب اسمبلی کے حلقے پی پی 218 ملتان کے ضمنی انتخاب میں غیرسرکاری اور غیر حتمی نتیجے میں تحریک انصاف نے ایک بار پھر فتح سمیٹ لی۔
پی ٹی آئی کے واصف راں نے 46988ووٹ لے کر میدان مار لیا، ضمنی انتخاب میں ان کے مد مقابل پیپلزپارٹی کے امیدوار ملک ارشد راں39486ووٹ لے کر دوسرے نمبر پر رہے۔
مذکورہ حلقے میں138پولنگ اسٹیشن قائم کیے گئے تھے، جن میں سے32اسٹیشنوں کو حساس قرار دیا گیا، ووٹنگ کا عمل صبح 8 بجے سے شام 5 بجے تک بغیر کسی وقفے کے جاری رہا۔
اس موقع پر سیکیورٹی کے سخت انتظامات کیے گئے تھے۔ کسی بھی ناخوشگوار واقعے سے نمٹنے کیلئے ایک ہزار سے زائد پولیس اہلکار اور پاک فوج کے جوان اپنی ڈیوٹی پر موجود تھے۔
اس حوالے سے پی ٹی آئی کے رہنما شاہ محمود قریشی کا کہنا ہے کہ ملتان میں نون لیگ اور پیپلزپارٹی کا گٹھ جوڑ ناکام ثابت ہوا ہے، ملتان کی عوام نے کرپشن کو مسترد کردیا۔
ملک واصف راں کے ہمراہ میڈیا سے گفتگو میں وزیر خارجہ کا کہنا تھا کہ آج چوروں کی چوری پکڑی گئی ہے،۔ ضمنی الیکشن میں واصف راں نے ساڑھے سات ہزار ووٹ کی برتری حاصل کرلی ہے۔
انہوں نے کہا کہ پی پی 218 کے ضمنی انتخاب میں (ن) لیگ اور پی پی پہلی بار اکٹھے ہوئے لیکن انہیں شکست ہوئی، نون لیگ اور پیپلزپارٹی کا اتحاد کامیاب نہیں ہوسکا ہے۔
