ملتان : وفاقی وزیر خارجہ شاہ محمود قریشی نے کہا ہے کہ گیلانی صاحب کے صاحبزادے پیپلز پارٹی چھوڑ سکتے ہیں، اگلے الیکشن میں سندھ میں پی ٹی آئی اور اتحادیوں کی حکومت ہوگی۔
ان خیالات کا اظہار انہوں نے ملتان میں میڈیا سے گفتگو کرتے ہوئے کیا، شاہ محمود قریشی نے کہا کہ یوسف رضا گیلانی کے صاحبزادے پھسل جاتے ہیں۔
بلاول بھٹو کو کہوں گا کہ گیلانی صاحب کے صاحبزادوں کو قابو میں رکھیں کیونکہ اطلاع ملی ہے کہ گیلانی صاحب کے صاحبزادے پیپلز پارٹی کو خیر باد کہہ سکتے ہیں، ان کا کہنا ہے کہ ہمیں ن لیگ میں چلے جانا چاہئے۔
ایک سوال کے جواب میں شاہ محمود قریشی کا کہنا تھا کہ پیپلزپارٹی کے پی، پنجاب اور بلوچستان سے مکمل طور پر فارغ ہوچکی ہے، پی پی صرف اندرون سندھ میں ہی محدود ہوکر رہ گئی ہے۔
انہوں نے مزید کہا کہ اگلے الیکشن میں سندھ میں پی ٹی آئی اور اس کے اتحادیوں کی حکومت قائم ہوگی، سندھ کے لوگوں میں شعورآرہا ہے اب جلد تبدیلی بھی دیکھیں گے۔
پنجاب اسمبلی کے حلقے پی پی 218 ملتان کے ضمنی انتخاب میں پی ٹی آئی کی کامیابی پر ان کا کہنا تھا کہ ملتان میں نون لیگ اور پیپلزپارٹی کا گٹھ جوڑ ناکام ثابت ہوا ہے، ملتان کی عوام نے کرپشن کو مسترد کردیا۔
ملک واصف راں کے ہمراہ میڈیا سے گفتگو میں وزیر خارجہ کا کہنا تھا کہ آج چوروں کی چوری پکڑی گئی ہے۔ ضمنی الیکشن میں واصف راں نے ساڑھے سات ہزار ووٹ کی برتری حاصل کرلی ہے۔
انہوں نے کہا کہ پی پی 218 کے ضمنی انتخاب میں (ن) لیگ اور پی پی پہلی بار اکٹھے ہوئے لیکن انہیں شکست ہوئی، نون لیگ اور پیپلزپارٹی کا اتحاد کامیاب نہیں ہوسکا ہے۔
