کراچی : خاتون مسافر کی بد تمیزی کے باعث پی آئی اے کی کراچی سے لاہور جانے والی پرواز تاخیر کا شکار ہوگئی، مسافروں کو پریشانی کا سامنا کرنا پڑا۔
تفصیلات کے مطابق کراچی سے لاہور جانے والی پی آئی اے کی پرواز پی کے304 کو اس وقت ٹیک آف پوائنٹ سے واپس لانا پڑا جب خاتون مسافر کی بدتمیزی کے باعث دیگر مسافروں نے طیارے میں شور شرابہ شروع کردیا جس پر کپتان نے طیارے کو واپس جیٹی پر لگادیا اور خاتون مسافر کو آف لوڈ کردیا گیا۔
تین بجے روانہ ہونے والی پرواز کو اکانومی کلاس کی سیٹ نمبر ایف تھری سے خاتون مسافر کی وجہ سے واپس لایا گیا، اکانومی کلاس کی سیٹ نمبر ایف تھری میں موجود خاتون اپنے نومولود بچے کے ساتھ اکانومی پلس میں جا بیٹھی۔
جہاز کے عملے اور کپتان نے خاتون مسافر کو اپنی نشست پر واپس جانے کی ہدایت کی تو مذکورہ خاتون مسافر نے اکانومی کلاس میں واپس جانے سے انکار کردیا۔
عملے کے اسرار پر خاتون مسافر نے عملے سے بدتمیزی کی اور نازیبا الفاظ استعمال کیے۔ خاتون مسافر دو دن کا نومولود بچہ لے کر سفر کررہی تھی۔
پی آئی اے کے عملے نے جب بچے کی پیدائش کا سرٹیفکیٹ طلب کیا جس پر بھی خاتون نے انکار کردیا، خاتون مسافر کی ضد کے باعث ڈیڑھ سو مسافر جہاز کی روانگی کے منتطر رہے۔
بعد ازاں برتھ سرٹیفکیٹ نہ دکھانے پر پرواز کو ٹیک آف پوائنٹس سے واپس کردیا گیا، ترجمان پی آئی اے کے مطابق خاتون مسافر کے نازیبا رویے کے باعث پرواز کی روانگی میں ایک گھنٹے سے زائد تاخیر ہوئی، بعد ازاں مسافر خاتون کو نومولود بچے سمیت آف لوڈ کردیا گیا۔
