اسلام آباد: وزیرِ خزانہ اسد عمر نے نیشنل پرائس مانیٹرنگ کمیٹی کو 3 سے 6 ماہ کے لیے اشیاے ضروریہ کی طلب و رسد کی پیش گوئی کا نظام لانے کی ہدایت کر دی۔
تفصیلات کے مطابق آج اسلام آباد میں وزیرِ خزانہ اسد عمر کی زیرِ صدارت نیشنل پرائس مانیٹرنگ کمیٹی کا اجلاس منعقد ہوا، وزیرِ خزانہ نے اجلاس میں ہدایت کی سہ ماہی یا ششماہی بنیادوں پر اشیاے ضروریہ کی طلب اور رسد سے متعلق پیش گوئی کا نظام تشکیل دیا جائے۔
قبل ازیں اجلاس میں اشیاے ضروریہ کی قیمتوں، اور ان کی طلب و رسد پر وزیرِ خزانہ کو بریفنگ دی گئی۔ انھیں مہنگائی سے متعلق بتایا گیا کہ ٹماٹر، پیاز، چنے اور دالیں موسم کی وجہ سے مہنگی ہوئی ہیں۔
اجلاس میں فیصلہ کیا گیا کہ نیشنل پرائس مانیٹرنگ کمیٹی کا اجلاس ماہانہ بنیاد پر بلایا جائے گا۔
وزیرِ خزانہ اسد عمر نے کہا کہ قیمتیں کنٹرول کرنے کے لیے مارکیٹ کمیٹیز کو متحرک کیا جائے۔ انھوں نے ہدایت کی کہ مہنگائی کنٹرول کرنے کے لیے رائج قوانین بہتر بنانے کے لیے بھی جائزہ لیا جائے۔
یہ بھی پڑھیں: ادویات کی قیمتوں میں بلا جواز اضافہ، وفاقی حکومت نے ایکشن لے لیا
دریں اثنا، وزیرِ اعظم نے فارما سیوٹیکلز کی قیمتوں کا جائزہ لینے کے لیے بھی 8 اپریل کو اجلاس بلا لیا ہے۔
خیال رہے کہ ادویات کی قیمتوں میں بلا جواز اضافہ کر کے فارما سیوٹیکل کمپنیوں نے غریب عوام کی مشکلات میں مزید اضافہ کر دیا ہے، جس پر وفاقی حکومت نے گزشتہ روز ایکشن لیا۔
