واشنگٹن: وائٹ ہاؤس کے اقتصادی مشیر لیری کوڈلو نے کہا ہے کہ چین اور امریکا کے درمیان تجارتی مذاکرات میں مثبت پیش رفت ہوئی ہے۔
غیرملکی خبررساں ادارے کے مطابق وائٹ ہاؤس کے اقتصادی مشیر لیری کوڈلو نے کہا ہے کہ چین نے پہلی مرتبہ تجارتی مسائل کو تسلیم کیا ہے، جن مسائل کو چین نے تسلیم کیا امریکا کئی برسوں سے ان کی نشاندہی کرتا رہا ہے۔
انہوں نے کہا کہ دونوں ملکوں کے درمیان مذاکرات کا نیا دور امریکی دارالحکومت میں شروع ہوچکا ہے، امریکی صدر ڈونلڈ ترمپ مذاکرات میں چینی وفد کی قیادت کرنے والے نائب وزیراعظم لیو ہی سے ملاقات کریں گے اور مذاکراتی عمل پر گفتگو کریں گے۔
واضح رہے کہ چین اور امریکا کے درمیان تجارتی جنگ کے باعث عالمی معیشت پر بھی دباؤ نظر آرہا ہے، دونوں ممالک کی معیشت دنیا کی دو بڑی معیشت تصور کی جاتی ہیں، جس کا براہ راست اثر عالمی معیشت پر پڑتا ہے۔
مزید پڑھیں: تجارتی جنگ، امریکی صدر نے چین کے ساتھ جلد معاہدہ طے پانے کی نوید سنا دی
یاد رہے کہ گذشتہ دنوں بھی امریکی صدر ڈونلڈ ٹرمپ نے امکان ظاہر کیا تھا کہ مذاکرات میں پیش رفت ہورہی ہے اور جلد معاہدہ طے پاجائے گا۔
انہوں نے یہ بھی کہا تھا کہ دونوں ممالک کے درمیان مذاکرات کا سلسلہ احسن انداز میں جاری ہے، ممکن ہے دوطرفہ مفاد کو مدنظر رکھتے ہوئے جلد ایک معاہدہ ہوجائے۔
خیال رہے کہ امریکا نے چینی مصنوعات پر 16 ارب کے اضافی محصولات عائد کیے تھے جس کے جواب میں چین نے بھی امریکی مصنوعات پر اضافی محصولات عائد کردئیے تھے۔
