کراچی: ایم کیو ایم پاکستان کے رہنما اور رکن سندھ اسمبلی خواجہ اظہار الحسن نے پاک سرزمین پارٹی میں شمولیت اختیار کرنے والے نااہل ڈپٹی میئر ارشد وہرہ کو واپسی کی دعوت دے دی۔
ڈپٹی میئر کے الیکشن کے موقع پر بلدیاتی کونسل کے باہر میڈیا سے گفتگو کرتے ہوئے خواجہ اظہار نے ایم کیو ایم کے امیدوار کو پیشگی مبارک باد دیتے ہوئے کہا تھا کہ ’’پیپلزپارٹی اُتنی ہی آگ بھڑکائے جتنی وہ بجھا سکیں‘‘۔
انہوں نے ارشد وہرہ کو پارٹی میں واپسی کی دعوت دیتے ہوئے کہا کہ ’ ہمارے دروازے آپ کے لیے کھلے ہیں، واپس آئیں اور کراچی کی بہتری کے لیے ایم کیو ایم کے ساتھ مل کر کام کریں‘۔
یاد رہے کہ بلدیاتی کونسل میں ارشد وہرہ کی نااہلی کے بعد خالی ہونے والی ڈپٹی میئر کی نشست پر الیکشن ہوا تھا جس میں ایم کیو ایم کے امیدوار ارشد حسن نے باآسانی میدان مارا۔
مزید پڑھیں: ڈپٹی میئر کراچی کا انتخاب، ایم کیو ایم پاکستان نے میدان مار لیا
پولنگ صبح 9 بجے سے شام پانچ بجے تک جاری رہی جس میں 300 بلدیاتی نمائندوں کو اپنا ووٹ کاسٹ کرنا تھا البتہ 281 چیئرمینز نے اپنا حق رائے دہی استعمال کیا۔ گنتی کے دوران 09 ووٹ مسترد بھی ہوئے۔
مجموعی طور پر 281 ووٹ کاسٹ ہوئے جن میں سے 272 کو گنتی میں شمار کیا گیا۔ نتائج کے مطابق ایم کیو ایم کے امیدوار سید ارشد حسن 194 ووٹ لے کر فاتح قرار پائے جبکہ اُن کے مدمقابل پی پی کے امیدوار صرف 78 ووٹ حاصل کرسکے۔
یاد رہے کہ گزشتہ سال اکتوبر میں ڈپٹی میئر کراچی ڈاکٹرارشد وہرا ایم کیو ایم پاکستان کو خیرآباد کہہ کر پاک سرزمین پارٹی میں شامل ہوگئے تھے۔ بعدازاں ایم کیو ایم کی جانب سے الیکشن کمیشن میں ان کی نااہلی کی درخواست دائر کی گئی تھی جس میں کہا گیا تھا کہ ارشد وہرا کو ڈپٹی میئر کے عہدے سے ہٹایا جائے اور نا اہل کیا جائے۔
یہ بھی پڑھیں: الیکشن کمیشن نے ڈپٹی میئرکراچی ارشد وہرہ کو نا اہل قراردےدیا
الیکشن کمیشن آف پاکستان نے پاک سرزمین پارٹی کے رہنما ارشد وہرا کو نا اہل قرار دیا تھا۔ پی ایس پی رہنما ضلع سینٹرل کراچی کی یونین کونسل 49 سے چیئرمین منتخب ہوئے تھے۔
