گھوٹکی: سندھ کے علاقے گھوٹکی کے نواحی علاقے میں بکری کو بچاتے ہوئے چار افراد کنویں میں ڈوب کر جاں بحق ہوگئے۔
تفصیلات کے مطابق گھوٹکی کے نواحی علاقے میں بکری کی جان بچانے کے لیے کنویں میں کودنے والے چار افراد اپنی جانیں گنوا بیٹھے، تین افراد کی نعشیں نکال لی گئیں چوتھے کی تلاش جاری ہے۔
رپورٹ کے مطابق جاں بحق ہونے والوں میں دو سگے بھائی جاوید ملک اور صوبہ ملک شامل ہیں، جاں بحق ہونے والوں کی لاشیں میرپور ماتھیلو کے ڈی ایچ کیو اسپتال منتقل کردی گئیں۔
کنویں میں ڈوبنے والے چوتھے شخص کی شناخت اعجاز ملک کے نام سے ہوئی ہے جس کی تلاش کے لیے ریسیکیو ٹیمیں مصروف عمل ہیں۔
مزید پڑھیں: کراچی: نالے میں گرنے والے 3 بچے دم توڑ گئے، ایک بچے کی تلاش جاری
پولیس کے مطابق لاشوں کو ضابطے کی کارروائی کے بعد ورثاء کے حوالے کردیا جائے گا، واقعے کے بعد علاقے میں سوگ کی فضا ہے۔
اسپتال ذرائع کے مطابق خالی کنویں میں زہریلی گیس کے اخراج کے باعث تمام افراد دم گھٹنے سے جانبر نہ ہوسکے۔
واضح رہے کہ رواں ماہ کے اوائل میں کراچی کے علاقے نارتھ ناظم آباد میں سیوریج کے نالے میں تین بچے ڈوب کر جاں بحق ہوگئے تھے جبکہ چوتھے بچے کو زندہ نکال لیا گیا تھا۔
کھیل کے دوران ایک بچے کی چپل نالے میں گری جس کو اٹھانے کے دوران وہ نالے میں گرا بچے کو بچانے کی کوشش میں باقی بچے بھی نالے میں گر کر جاں بحق ہوئے تھے۔
