اسلام آباد: پی ٹی آئی رہنما بابر اعوان نے کہا ہے کہ صدارتی نظام کی بات کا مقصد جعلی اکاؤنٹس اسکینڈل سے توجہ ہٹانا ہے۔
ان خیالات کا اظہار انھوں نے بلاول بھٹو زرداری کی تقریر پر ردعمل دیتے ہوئے کیا. ان کا کہنا تھا کہ حکومت کو احتساب کے عمل سے ہٹانے کی کوشش کی جارہی ہے.
انھوں نے کہا کہ وزیراعظم عمران خان سے آج بیجنگ میں بھی رابطہ ہوا، وہ کرپشن کے معاملے پر کوئی سمجھوتا نہیں کریں گے.
بابر اعوان کا کہنا تھا کہ یہ لوگ حکومت کو کسی بھی طریقے سے ڈی ریل کرنا چاہتے ہیں، صدارتی نظام پر یا تو مس گائیڈ ہورہے ہیں یا پھر یہ مس فائر ہے، ملک ٹوٹنے کی پیش گوئی یا خواہش کرنے والوں کے منہ میں خاک ، ملک میں ادارے ہیں، پاکستان نہیں ٹوٹے گا.
مزید پڑھیں: صدارتی نظام پاکستان کے لئے نقصان دہ اور غیر جمہوری ہوگا،: بلاول بھٹو زرداری
انھوں نے کہا کہ صدارتی نظام کے لئے دوتہائی اکثریت لازمی ہے، وہ ہے ہی نہیں، ملک نہیں، کسی کی خواہشیں اور اکاؤنٹ ٹوٹ رہے ہیں تو الگ بات ہے، نوازشریف نے کیوں نکالا کا راگ الاپا، یہ صدارتی نظام کا ڈراما رچا رہے ہیں.