اسلام آباد: وزیر اعظم عمران خان نے شمالی وزیرستان میں باڑھ لگانے والے فوجیوں پر حملے کی شدید مذمت کرتے ہوئے شہیدوں کے لواحقین سے اظہار ہمدردی کیا۔
تفصیلات کے مطابق وزیر اعظم عمران خان نے سماجی رابطے کی ویب سائٹ ٹویٹر پر اپنے ٹویٹ میں شمالی وزیرستان میں باڑھ لگانے والے فوجیوں پر حملے کی شدید مذمت کی ہے۔
وزیر اعظم کا کہنا تھا کہ دہشت گردی کے خلاف جوانوں کی بہادری اور قربانی کو سلام پیش کرتا ہوں۔ انہوں نے حملے میں شہید 3 جوانوں کے لواحقین سے اظہار ہمدردی بھی کیا۔
My condolences & prayers go to the families of our 3 soldiers martyred while repulsing condemnable terrorist attack in Alwara area of N Waziristan. We salute the bravery & sacrifices of our soldiers in combating terrorists.
— Imran Khan (@ImranKhanPTI) May 2, 2019
خیال رہے کہ مذکورہ واقعہ گزشتہ روز پیش آیا جب شمالی وزیرستان میں سرحد پر باڑھ لگانے والی پاک فوج کی ٹیم پر سرحد پار سے حملہ کیا گیا، الوڑہ کے مقام پر 60 سے 70 دہشت گردوں نے افغانستان کی حدود سے حملہ کیا۔
پاک فوج نے مؤثر جوابی کارروائی کر کے حملہ آوروں کو پسپا کردیا۔ پاک فوج کی جوابی کارروائی میں کئی دہشت گردمارےگئے جبکہ دہشت گردوں کی فائرنگ سے پاک فوج کے 3 جوان شہید اور 7 زخمی ہوگئے۔
شہید جوانوں میں لانس نائیک علی، لانس نائیک نذیر اور سپاہی امداد اللہ شامل ہیں۔
پاک فوج کے شعبہ تعلقات عامہ (آئی ایس پی آر) کے مطابق پاکستان تمام تر رکاوٹوں کے باوجود باڑھ لگانے کا عمل جاری رکھے گا، افغان فورسز اور حکام اپنی سرزمین پاکستان کے خلاف استعمال نہ ہونے دیں۔
2 ہزار 6 سو 11 کلو میٹر پاک افغان سرحد پر اب تک پاک فوج کی ٹیم ایک ہزار سے زائد کلو میٹر باڑھ لگانے میں کامیاب ہوگئی ہے۔
