اسلام آباد: وفاقی وزیر برائے سائنس و ٹیکنالوجی فواد چوہدری کا کہنا ہے کہ کم ازکم چاند دیکھنے کا تو معاوضہ نہیں ہونا چاہیے۔
تفصیلات کے مطابق وفاقی وزیر برائے سائنس اینڈ ٹیکنالوجی فواد چوہدری نے کہا کہ علما کا احترام ہے لیکن دینا میں ایسے معاملات رضا کارانہ بنیادوں پرہوتے ہیں، میں نے رائے دی ہے ہرکسی کا متفق ہونا ضروری نہیں ہے۔
انہوں نے کہا کہ عید اور رمضان کے چاند پر36 سے 40 لاکھ خرچ کرنا کہاں کی عقل مندی ہے، چاند دیکھنے پر قومی خزانےسے رقم خرچ ہورہی ہے۔
فواد چوہدری نے کہا کہ کم ازکم چاند دیکھنے کا تومعاوضہ نہیں ہونا چاہیے، رویت ہلال کمیٹی کے ممبران چاند تو رضاکارانہ دیکھ لیا کریں۔
وفاقی وزیر برائے سائنس و ٹیکنالوجی نے کہا کہ پڑھے لکھےعلما کرام میری تجویزکی حمایت کررہے ہیں، چاند دیکھنے کے لیے سائنس اینڈ ٹیکنالوجی سے فائدہ اٹھانا چاہیے۔
فواد چوہدری نے مزید کہا کہ 10سال کا کیلنڈربن جائے گا توغیرضروری اخراجات سے بچ جائیں گے۔
یاد رہے کہ گزشتہ روز مفتی منیب الرحمان نے وزیراعظم عمران خان سے اپیل کی تھی کہ دین کے معاملات پر جو متعلقہ وزیر ہیں، وہ بات کریں، ہروزیر دین کی حساسیت کو نہیں سجھتا لہذا انہیں دینی معاملات پر تبصرہ کرنے کا فری لائسنس نہیں ملنا چاہیے۔
