کراچی: سندھ ہائی کورٹ نے پیٹرولیم مصنوعات کی قیمتوں میں اضافے سے متعلق فریقین کو 16 مئی تک جواب جمع کرانے کا حکم دے دیا۔
تفصیلات کے مطابق سندھ ہائی کورٹ میں پیٹرولیم مصنوعات کی قیمتوں میں اضافے کے خلاف درخواست پر سماعت ہوئی۔
عدالت نے سماعت کے دوران وزارت پیٹرولیم، وفاقی حکومت اور دیگر کو نوٹس جاری کرتے ہوئے فریقین کو 16 مئی تک جواب جمع کرانے کا حکم دے دیا۔ سندھ ہائی کورٹ نے پیٹرول کی قیمتوں میں اضافے کا طریقہ کار بھی طلب کرلیا۔
سندھ ہائی کورٹ نے ریمارکس دیے کہ ایک ماہ قبل بھی نوٹس جاری کیا تھا جواب جمع نہیں کرایا، عدالت نے ایڈیشنل اٹانی جنرل کو حکم دیا کہ آئندہ سماعت پرہرصورت جواب جمع کرایا جائے۔
پٹرولیم مصنوعات کی قیمتوں میں اضافہ
وفاقی حکومت نے دو روز قبل پیٹرول کی قیمتوں میں 9 روپے 42 پیسے، ڈیزل کی قیمت میں 4 روپے 89 پیسے جبکہ مٹی کے تیل کی قیمت میں 7 روپے 46 پیسے فی لیٹر اضافہ کیا تھا۔
یاد رہے کہ اوگرا نے پیٹرول 14 روپے 37 پیسے فی لیٹر مہنگا کرکے 113 روپے کرنے کی سفارش کی تھی، تاہم وفاقی کابینہ نے پیٹرولیم مصنوعات کی قیمتوں میں اضافے کا معاملہ ای سی سی کو بھجوایا تھا۔
اقتصادی رابطہ کمیٹی نے پیٹرول کی فی لیٹر قیمت میں 9 روپے اضافے کی سفارش کی تھی۔
